Nensi Reyqan vəfat etdi

ABŞ-ın 40-cı Prezidenti Ronald Reyqanın həyat yoldaşı Nensi Reyqan 94 yaşında vəfat edib.

Teleqraf.com Anadolu Agentliyinə istinadla xəbər verir ki, Reyqan Vəqfinin yaydığı məlumata görə, Nensi Reyqan Los-Ancelesdəki evində ürək çatışmazlığından dünyasını dəyişib.

Nensi Reyqan 1981-1989-cu illərdə ABŞ-da Prezident olan Ronald Reyqanın həyat yoldaşı kimi birinci xanım statusunu daşıyıb.

1921-ci il iyulun 6-da Nyu-Yorkda anadan olan və bir müddət kinolara çəkilən Nensi Reyqan 2004-cü ildə vəfat edən Ronald Reyqanla 52 il birgə həyat sürüb. O, 1998-ci ildə verdiyi açıqlamasında bildirmişdi: “Mənim həyatım real olaraq yoldaşımla evləndikdən sonra başladı. Tanrıya şükür edirəm ki, biz bir-birimizi tapmışıq. Onsuz bir həyatı düşünə bilmirəm”.

Nensi Reyqanın cənazəsinin Prezidentlik Kitabxanası yaxınlığında Ronald Reyqanın qəbrinin yanında basdırılacağı bildirilir.