"Brüssel üçün "Dağlıq Qarabağ" ifadəsi artıq yoxdur" - Armen Aşotyan

"Nikol Paşinyanın məğlubiyyəti üzündən Brüssel üçün artıq "Dağlıq Qarabağ" və "erməni hərbi əsirlər" problemi yoxdur".

Teleqraf.com "news.am"a istinadən xəbər verir ki, bunu Ermənistanın sabiq prezidenti Serj Sarqsyanın rəhbəri olduğu Respublikaçılar Partiyasının sədr müavini Armen Aşotyan bildirib.

“Mənim fikirlərim bu il iyulun 18-də dərc edilmiş və Avropa Komissiyasının baş katibinin imzaladığı rəsmi sənədə əsaslanır. Sənəd Azərbaycanla tərəfdaşlığın icra hesabatı adlanır. Yəni Avropa İttifaqının Azərbaycanla tərəfdaşlıq proqramı var. Bu hesabatda onların Azərbaycanla əlaqələri, qiymətləndirmələri, problemləri və müxtəlif sahələrdə qeydə alınan uğurları ümumiləşdirilmişdir. Azərbaycanla münasibətlər kontekstində təhlükəli olmayan məsələlərə də qiymət verilməsi təbiidir. Bütün bu mətndə “Dağlıq Qarabağ” ifadəsi demək olar ki, işlədilmir. Ermənistan-Azərbaycan problemlərindən danışan rəsmi Brüssel “Dağlıq Qarabağ” ifadəsindən tamamilə imtina edib və “Qarabağ” sözü cəmi bir dəfə işlədilib. Avropa İttifaqının rəsmi cavabına görə, "Dağlıq Qarabağ" adlı yer yoxdur və bu, Nikol Paşinyanın xəyanətkar siyasətinin nəticəsidir. Nikol Paşinyanın üçtərəfli görüş zamanı etdikləri, yəni “Dağlıq Qarabağ” ifadəsini işlətməkdən imtina etməsi indi rəsmi sənədlərdə əksini tapıb”, - Aşotyan bildirib.