Rusiya özünə gəlməmiş daha bir zərbə aldı – İrəvan elə bir qərar verir ki...

Ermənistan Avropa İttifaqına üzvlük marafonunda Gürcüstandan geri qalmaq istəmir.

Teleqraf.com xəbər verir ki, bunu politoloq Elxan Şahinoğlu deyib.

Ekspert Ermənistanın Avrasiya İqtisadi Birliyindən çıxacağını istisna etmir:

“Ermənistan parlamentinin sədri Alen Simonyan Baş nazir Nikol Paşinyanın danışan dilidir. Simonyan dünən Rusiya sərhədçilərinin Ermənistan ərazisini tərk etməsi vacibliyini bildirmişdisə, bu gün ölkəsinin Avropa İttifaqına üzv olmaq istəyini səsləndirib. İrəvandan hər gün Kremli qıcıqlandıran açıqlama gəlir.

Kreml Paşinyanın Ermənistanın KTMT-ni de-yure tərk edə biləcəyi ilə bağlı açıqlamasından özünə gəlməmiş, indi də müttəfiqinin Avropa İttifaqına üzvlük istəyinə qarşı həmlələrə hazırlaşmalıdır. Çünki Avropa İttifaqına üzvlüklə Avrasiya İqtisadi Birliyinə üzvlük ziddiyət təşkil edir.

Ermənistan bunlardan birinə üstünlük verməlidir, əgər Avropa İttifaqına üzvlüyə namizədliyə üstünlük verəcəksə, Avrasiya İqtisadi Birliyini tərk etməyə hazırlaşmalıdır. Bu isə Ermənistan iqtisadiyyatına ciddi zərbə olacaq. Çünki Ermənistan hazırda Avrasiya İqtisadi Birliyi çərçivəsində üzvlük güzəştlərindən istifadə edir, digər üzv ölkələrlə ticarətdən gəlir əldə edir. Bunların heç birini Avropa İttifaqı Ermənistana təqdim etmir.

Ancaq o da aydındır ki, İrəvan üzünü Avropaya tutub, Paşinyan elə ona görə bir müddət əvvəl Tiflisə gedərək Gürcüstanla strateji tərəfdaşlıq sazişi imzaladı. Ermənistan Avropa İttifaqına üzvlük marafonunda Gürcüstandan geri qalmaq istəmir”.