Tibb Universitetinin yeni rektoru nöqsanlardan danışdı: “Əvvəlki attestasiyalar zamanı...”

Bu ildən Azərbaycanda həkimlərin yekun attestasiyası yeni qaydalarla aparılacaq.

Teleqraf.com-un məlumatına görə, Azərbaycan Tibb Universitetinin rektoru Gəray Gəraybəyli rezidentlərin yekun attestasiyasının təşkilinə dair geniş müzakirələrdə belə deyib.

Rektor bildirib ki, bu il ilk dəfə rezidenturada həkim mütəxəssis hazırlığı aparılan bütün ixtisaslar üzrə yekun attestasiya keçiriləcək. Qaydalara uyğun olaraq, yekun attestasiya 2 mərhələdə aparılacaq. Birincisi test, ikincisi isə praktiki vərdişlərin mənimsənilməsinə görə müxtəlif kliniki halların araşdırılması mərhələsidir: “Əmrə əsasən, yekun attestasiyanın I mərhələsi oktyabrın 25-də, II mərhələsi isə oktyabr ayının 27 və 28-i tarixlərində keçirilməlidir.

Attestasiyanın ilk mərhələsi Azərbaycan Tibb Universitetinin virtual test mərkəzində, II mərhələ isə universitetin müvafiq klinikalarında olacaq”.

Gəray Gəraybəyli qeyd edib ki, əvvəlki illərdə keçirilən yekun attestasiyası zamanı bəzi çatışmazlıqlar qeydə alınıb. Onun sözlərinə görə, xüsusilə, test suallarının və təcrübi bacarıqların hazırlanmasında bəzi ixtisaslar üzrə tələbatlar lazımi səviyyədə olmayıb: “Bu barədə Səhiyyə Nazirliyindən də iradlar bildirilib. Çatışmazlıqların aradan qaldırılması məqsədilə xeyli iş görülüb, ayrı-ayrı ixtisaslar üzrə test sualları və təcrübi bacarıqlara dair suallar yenilənib.

Rezidenturaya ilk qəbul 2011-ci ildə başlayıb. 2013-cü ildə təhsil müddəti 2 il olan ixtisaslar üzrə, 2014-cü ildə təhsil müddəti 2 və 3 il olan ixtisaslar üzrə və 2015-ci ildə təhsil müddəti 2, 3 və 4 il olan ixtisaslar üzrə yekun attestasiyası keçirilib.

Bu il isə əlavə olaraq təhsil müddəti 5 il olan cərrahi yönümlü ixtisaslar üzrə də yekun attestasiyası keçiriləcək. Bu il bütün ixtisaslar üzrə Bakı şəhərində olan bazalardan 356 nəfər yekun attestasiyasına buraxılıb ki, onların da ayrı-ayrı ixtisaslar üzrə sayı təhsil müddəti 2 il olan 8 ixtisas üzrə - 68 nəfər, təhsil müddəti 3 il olan 9 ixtisas üzrə - 81 nəfər, təhsil müddəti 4 il olan 12 ixtisas üzrə - 110 nəfər və təhsil müddəti 5 il olan 9 ixtisas üzrə - 55 nəfərdir. Bunlardan 115 nəfəri ATU-nun məzunudur.

Bundan əlavə, 2015-ci ildə attestasiyaya buraxılmayan 16 nəfər və attestasiyanın I və ya II mərhələlərindən keçə bilməyən 13 nəfər də bu il yekun attestasiyada iştirak edəcək”.