KİVDF jurnalist müsabiqəsinin nəticələrini açıqladı - FOTO

Martın 15-də Beynəlxalq Mətbuat Mərkəzində Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) Novruz bayramı münasibətilə elan etdiyi fərdi jurnalist yazıları müsabiqəsinin qaliblərinin mükafatlandırılma mərasimi keçirilib.

Teleqraf.com xəbər verir ki, mükafatlandırılma mərasimində ölkənin aparıcı kütləvi informasiya vasitələrinin rəhbərləri, yazıları qiymətləndirən ekspertlər və müsabiqədə qalib olmuş jurnalistlər iştirak ediblər.

Mərasimdə çıxış edən Fondun icraçı direktoru Vüqar Səfərli ilk öncə tədbir iştirakçılarını Novruz Bayramı münasibəti ilə təbrik edib, onlara yeni uğurlar arzulayıb.

Vüqar Səfərli bildirib ki, müsabiqəyə 71 kütləvi informasiya vasitəsindən 151 yazı təqdim edilib: "Yazılar ekspertlər tərəfindən qiymətləndirilib və Fondun Müşahidə Şurasının qərarı ilə 15 istiqamət üzrə altı qalib müəyyən edilib. Onlardan ikisi ikinci yer, üçü üçüncü yer və biri birinci yerin qalibi olub.

Yazıları 12 ekspert qiymətləndirib və ən yüksək bal toplayan jurnalistlər müşahidə şurasının qərarı ilə mükafatlandırılıb".

Vüqar Səfərli qeyd edib ki, əvvəlki müsabiqələrdən fərqli olaraq ikinci, üçüncü yer tutan qaliblərə diplomlar verilməyəcək.

Mərasimdə çıxış edən Mətbuat Şurasının sədri, millət vəkili Əflatun Amaşov iştirakçıları qarşıda gələn Novruz Bayramı münasibəti ilə təbrik edib: "Müsabiqəyə təqdim edilən məqalələrin keyfiyyəti kifayət qədər yüksəlib. Jurnalistlər çalışırlar ki, faktları düzgün işlətsinlər, mənbələri etibarlı olsun. Bu da jurnalistikanın peşəkarlığının artmasında kifayət qədər böyük inkişafdır".

Sonra tədbirdə Fondun ekspertləri müsabiqələrə təqdim edilmiş yazılar barədə fikir və rəylərini bildiriblər.

Ekspertlər qeyd ediblər ki, jurnalistlərin müsabiqəyə təqdim etdiyi yazılar bu dəfə daha keyfiyyətli olub. Onlar jurnalistlərə Fondun təşkil etdiyi müsabiqəyə təqdim edilən yazıalara daha yaradıcı yanaşmağı, tədqiqat və araşdırmalara geniş yer ayırmağı, fərdi və orijinal yazı üslubuna üstünlük verməyi tövsiyə ediblər.

Sonda müsabiqədə yer tutan qaliblər mükafatlandırılıb.