Adil Əliyev: "Onun-bunun kölgəsində gizlənir"

Öz məğlubiyyətini, acizliyini həzm edə bilməyən erməni yaraqlıları birinci dəfə deyil ki, mülkü əhaliyə atəş açır. Bu halların mütəmadi xarakter daşımasına, açıq şəkildə təxribat törətmələrinə baxmayaraq beynəlxalq təşkilatlar, ermənilərin himayədarları hələ də susur.

Teleqraf.com xəbər verir ki, bunu Azərbaycan Milli Məclisinin Müdafiə, təhlükəsizlik və korrupsiya ilə mübarizə komitəsinin üzvü Adil Əliyev deyib.

O bildirib ki, atəşə tuş gələn 2 yaşlı körpənin və bir nəfər dinc sakinin öldürülməsi quduzlaşmış ermənilərin vəhşiliyinin növbəti göstəricisidir: "Beynəlxalq təşkilatlar niyə susur? Səbəb nədir? İşğalçını yerində otuzdurmaq məqamı çatmadımı hələ?! İllərdir, öz yurd-yuvalarından didərgin salınan insanların ah nələsini duymurmu bu ikiüzlü təşkilatlar? Bir halda ki, qorxaq Ermənistan danışıqlardan boyun qaçıraraq onun-bunun kölgəsində gizlənir, o zaman biz daha sərt şəkildə mövqeyimizi ifadə etməliyik. Hesab edirəm ki, Azərbaycanın ordusu cinayətkarlarla elə onların anlayacaqları dildə danışmalı, körpə balalarımızın qanını yerdə qoymamalıdır. İnanıram, Ermənistan gec-tez öz cəzasını alacaq".

Qeyd edək ki, iyulun 4-də Ermənistan silahlı qüvvələri tərəfindən Füzuli rayonunun Alxanlı kəndi 82 və 120 millimetrlik minaatanlardan və dəzgahlı qumbaraatanlardan atəşə tutulub. Ermənistan tərəfinin bu təxribatı nəticəsində kənd sakinləri 1966-cı il təvəllüdlü Allahverdiyeva Sahibə İdris qızı və 2016-cı il təvəllüdlü Quliyeva Zəhra Elnur qızı həlak olublar. Atəş nəticəsində qəlpə yarası alan 1965-ci il təvəllüdlü Quliyeva Sərvinaz İltifat qızı xəstəxanaya çatdırılaraq əməliyyata götürülüb.