Türkiyədə CHP-nin binasına hücum

Ötən gecə Türkiyənin aparıcı müxalifət partiyalarından olan CHP-nin binasına hücum olub.

Məlumata görə, gecə saatlarında Türkiyənin müxalif partiyalarından olan Cümhuriyyət Xalq Partiyasının (CHP) Çanaqqalanın Gelibolu rayonuna bağlı Evreşə bölgəsindəki binasına silahlı hücum təşkil edilib. Şəxsiyyəti naməlum şəxslər binanın qaşısında havaya bir neçə dəfə atəş açdıqdan sonra gəldikləri “Jeep” markalı avtomobillə ərazidən uzaqlaşıblar.

Atəş səslərindən qısa müddət sonra hadisə yerinə polis qrupları göndərilib, araşdırma aparılır.

Qeyd edək ki, CHP-nin Evreşə bölgə sədri İbrahim Türe silahlı hücumun AKP tərəfindən ediləcəyini iddia edir. O, bunu gündüz keçirilən məclis toplantısı zamanı tərəflər arasında yaşanan mübahisə ilə əsaslandırır.

/publika.az/