Deputatdan sərt etiraz: Müvafiq qurumlar bu çəkilişi araşdırsın - Video

Dünən sosial şəbəkələrdə Azərbaycan Silahlı Qüvvələrinin 100 illik yubileyi münasibətilə reportaj hazırlayan “CBC” telekanalının aparıcısı Elmira Musazadənin döyüş helikopterlərinə çox yaxın məsafədən çəkiliş apardığı videogörüntüsü yayıldı. Mən bu hərəkəti yolverilməz və təhlükəli hesab edirəm.

Teleqraf.com xəbər verir ki, bunu Milli Məclisin Müdafiə, təhlükəsizlik və korrupsiya ilə mübarizə komitəsinin sədr müavini Aydın Mirzəzadə bildirib.

O qeyd edib ki, helikopterlərin pərləri aparıcı qıza çox yaxın məsafədən keçirdi:

“Ani bir diqqətsizlik texnikanın və onun arxasınca gələn digər texnikaların ağır qəzasına, ən vacibi isə gənc qızın həyatını itirməsinə səbəb ola bilərdi. Müvafiq qurumları faktı araşdırmağa və belə təhlükəli və ehtiyac olmayan çəkilişlərə son qoyulmasına çağırıram”.