“Prezidentin ilk 100 günü” adlı tədbir keçirildi - Foto

İyulun 16-da Müdafiə Nazirliyinin Həzi Aslanov adına Mərkəzi Zabitlər Evində Yeni Azərbaycan Partiyası Nəsimi rayon təşkilatı tərəfindən “Prezidentin ilk 100 günü” adlı tədbir keçirilib.

Əvvəlcə tədbirdə Azərbaycan Prezidenti İlham Əliyevin andiçmə mərasiminə həsr olunan videoçarx nümayiş etdirilib.

Sonra YAP Nəsimi rayon təşkilatının sədri, Milli Məclisin deputatı Məlahət İbrahimqızı çıxış edərək bildirib ki, bu günlərdə dövlətimizin başçısı İlham Əliyevin 11 aprel prezident seçkilərində inamlı qələbəsinin 100 günü tamam olur. Fəxrlə deyə bilərik ki, ötən 100 gün ərzində dövlətimizin başçısı İlham Əliyevin rəhbərliyi ilə ölkəmizdə çox böyük nailiyyətlər əldə olunub. Hər zaman öz fəaliyyətində ulu öndər Heydər Əliyevin siyasi kursuna sadiq olan Prezidentimizin titanik fəaliyyəti ilə qısa müddətdə ölkəmizin hərtərəfli inkişafında mühüm uğurlar qazanılıb. Ölkəmizdə bütün sahələrdə, xüsusilə də dövlət idarəçiliyində mühüm islahatlar həyata keçirilib. Təsadüfi deyil ki, Prezidentin fəaliyyətinin 100 günü ulu öndər Heydər Əliyevin Azərbaycanda ilk dəfə hakimiyyətə gəlişinin 49-cu ildönümü ilə bir vaxtda qeyd edilir.

Milli Məclisin deputatı diqqətə çatdırıb ki, dahi rəhbər Heydər Əliyev bacarığı, işgüzarlığı və uzaqgörənliyi sayəsində dünya siyasi tarixində hər zaman özünəməxsus yeri ilə fərqlənib. Bütün dövrlərdə gücünü, dərin zəkasını xalqının yolunda sərf edən Ulu Öndər daxili və xarici təzyiqlərə, çətinliklərə baxmayaraq, müstəqil Azərbaycan dövlətini yaradıb. Bütün varlığı ilə Vətəni Azərbaycana, xalqına bağlı olan Heydər Əliyev müdrik siyasi və dövlət xadimi kimi uzun illər ərzində xalqımıza fayda verəcək qiymətli irs yaradıb. Müstəqil Azərbaycan dövləti bu zəngin irsdən faydalanır, sürətlə inkişaf edir, mövqelərini qətiyyətlə gücləndirir.

Tədbirdə ulu öndər Heydər Əliyevin fəaliyyəti haqqında videoçarx nümayiş etdirilib.

Nəsimi Rayon İcra Hakimiyyətinin başçısı, Yeni Azərbaycan Partiyası Siyasi Şurasının üzvü Asif Əsgərov xalqımızın dahi oğlu Heydər Əliyevin nəsillərə nümunə olan həyat və fəaliyyətindən, onun rəhbərliyi ilə əldə olunmuş uğur və nailiyyətlərdən danışıb. O deyib ki, ölkəmizin və xalqımızın taleyi, respublikamızın həyatının bütün sahələrində əldə edilmiş nailiyyətlər dahi şəxsiyyət Heydər Əliyevin adı, onun müdrik dövlətçilik siyasəti ilə bağlıdır. Haqlı olaraq Azərbaycan tarixinin Heydər Əliyev dövrü adlandırılan bu zaman kəsiyi ərzində Ulu Öndərimiz tərəfindən görülən böyük işlərin, onun həyata keçirdiyi xilaskarlıq və quruculuq missiyasının məntiqi nəticəsidir ki, bu gün xalqımız müstəqil, demokratik və hüquqi bir dövlətdə yaşamaq imkanı əldə edib, xoşbəxt gələcəyə qovuşmaq üçün bütün təminatlara, ən başlıcası isə siyasi və iqtisadi müstəqilliyə nail olub.

Sonra Azərbaycan Xalq Cümhuriyyətinə həsr olunan videoçarx göstərilib.

Tədbirdə çıxış edən Müdafiə Nazirliyinin mənəvi-psixoloji hazırlıq və ictimaiyyətlə əlaqələr idarəsinin rəisi general-mayor Rasim Əliyev Azərbaycan Silahlı Qüvvələrinin yaradılmasının 100 illik yubileyi münasibətilə iyunun 26-da Bakının Azadlıq meydanında keçirilən təntənəli hərbi paradın əhəmiyyətindən danışıb. Bildirib ki, hərbi parad xalqımızın öz ordusu ilə haqlı olaraq qürur duymasının və ona inamının real əsaslara dayanmasının təsdiqinə çevrildi. Bu gün Azərbaycan Ordusu istənilən vəzifəni icra etməyə qadirdir. Hərbi parad ordumuzun gücünü bir daha nümayiş etdirdi. Ordumuzun nəyə qadir olduğunu görən düşmən hazırda sarsılmış durumdadır. Bu parad xalqımızın Prezident İlham Əliyevin Ali Baş Komandanlığı ilə qüdrətli ordumuzun torpaqlarımızı tezliklə düşməndən azad edəcəyinə inamını daha da artırdı.

Daha sonra hərbi parada həsr olunan videoçarx nümayiş etdirilib.

Təhsil nazirinin müavini, YAP Nəsimi rayon təşkilatı İdarə Heyətinin üzvü Məhəbbət Vəliyeva dövlətimizin başçısı İlham Əliyevin təhsilin inkişafına daim böyük önəm verdiyini qeyd edib və ölkəmizdə məqsədyönlü təhsil siyasəti aparıldığını bildirib. O, bu sahədə qazanılan nailiyyətləri diqqətə çatdırıb. Qeyd edib ki, Azərbaycanda təhsil sahəsində qazanılan mühüm uğurlar dövlətimizin başçısının adı ilə bağlıdır.

Sonra TANAP-ın açılışına həsr olunan videoçarx göstərilib.

Azərbaycan Dövlət Neft və Sənaye Universitetinin rektoru, YAP Nəsimi rayon təşkilatı İdarə Heyətinin üzvü, professor Mustafa Babanlı Azərbaycanın uğurlu neft strategiyasından danışıb. Bildirib ki, ulu öndər Heydər Əliyevin uğurlu neft strategiyası müstəqil Azərbaycanın inkişafının təməlini qoyub. Ümummilli Lider xalqımız üçün çox işlər görüb. Ulu Öndərin müəllifi olduğu neft strategiyası bu gün müstəqil dövlət kimi Azərbaycanın öz milli sərvətinin sahibi olmasının təsdiqidir. Onun uğurlu neft strategiyası Azərbaycanı yeni inkişaf mərhələsinə yüksəldib.

Daha sonra Silahlı Qüvvələrin Təlim və Tədris Mərkəzinin Hərbi Orkestrinin solisti Ceyhun Kərimov Prezident, Ali Baş Komandan İlham Əliyevin fəaliyyətinin ilk 100 gününə həsr edilmiş “Apar zəfərə, Ali Baş Komandan!” mahnısını səsləndirib.