Adil Əliyev: "ABŞ Türkiyəni Ermənistanla səhv salıb"

"Deyəsən, Amerikada Türkiyəni Ermənistanla səhv salıblar. Ermənistan başqa dövlətin vassalıdır və ağasına asi olmaq ixtiyarında deyil. Türkiyə bu illərdə möhkəm istisadiyyat qurub və heç bir dövlətdən siyasi və hərbi asılılığı yoxdur".

Teleqraf.com xəbər verir ki, bunu millət vəkili Adil Əliyev son vaxtlar Türkiyə-ABŞ münasibətlərində müşahidə olunan gərginliyi şərh edərkən bildirib.

Onun sözlərinə görə, qara qüvvələr yenə qardaş Türkiyənin başı üstünü kəsdirib: " Türkiyə və ABŞ uzun illər müttəfiq olublar. Türkiyə Cümhurbaşqanı Rəcəb Təyyub Ərdoğan haqlı olaraq narazılığını bu şəkildə bildirir ki, uzun onilliklər ərzində Türkiyə Amerikanın bir çox xahişini yerinə yetirib. Türkiyə Amerikanın xahişi ilə 1950-ci illərdə hərbçilərini Koreya yarımadasına göndərdi, halbuki bu bölgədəki müharibənin Türkiyəyə az dəxli var idi və nə qədər hərbçisini itirdi. 1960-cı illərdə Amerika ilə SSRİ arasında yaranan dərin Karib böhranında yenə Türkiyə yada düşdü, SSRİ öz raketlərini Kubadan, Amerika isə Türkiyədən geri çəkdi və nəticədə dünya növbəti və dəhşətli müharibə risqindən qurtuldu. Terrorçular 2001-ci ildə Amerikaya hücum etdikdə Türkiyə yenə Amerikaya dəstək verdi və Vaşinqtonun istəyi ilə hərbçilərini NATO çərçivəsində Əfqanıstana göndərdi.
İndi bu qədər yaxşılığın qarşılığında ABŞ bir rahibə görə keçmiş müttəfiqinə qarşı sanksiyalar tətbiq edir, Türkiyə lirəsini və iqtisadiyyatını çökdürməyə çalışır. Əlbəttə, rahib məsələsi bəhanədir. Türkiyənin müstəqil xarici siyasəti və Avrasiya bölgəsində artan çəkisi Qərbdə bir sıra dairələrin xoşuna gəlmir. Ona görə bəlli qüvvələr Birinci Dünya Savaşı sonrası olduğu kimi Türkiyəni zəiflətməyə və parçalamağa çalışırlar. Ancaq necə ki, bu o illərdə alınmadı, indi də alınmayacaq. Terrorçu Gülən və PKK şəbəkəsi ilə bağlı Türkiyədə ev həbsində olan rahib Endryü Bransonun Amerikaya geri qaytarılmaması sadəcə bəhanədir. Bunu təsdiq edən odur ki, Amerika yenicə Türkiyəyə 8 maddəlik ağır şərtlər siyahısı göndərib. Həmin şərtləri oxuduqda ağlıma bircə cümlə gəldi. Bu şərtlərin yerinə yetirilməsi Türkiyənin müstəqil siyasətindən imtina edib, ancaq Amerikanın dediklərini etməsi demək olar".

Millət vəkilinə görə, Amerikada Türkiyəni Ermənistanla səhv salmamalıdır: " Ermənistan başqa dövlətin vassalıdır və ağasına asi olmaq ixtiyarında deyil. Türkiyə bu illərdə möhkəm istisadiyyat qurub və heç bir dövlətdən siyasi və hərbi asılılığı yoxdur. Bəli, son günlər türk lirəsi dəyərdən düşür, ancaq bu, dünyanın sonu deyil. Keçmiş illərdə Türkiyədə inflyasiya da olub, lirənin dəyərini itirdiyi illər də az olmayıb, ancaq qardaş ölkə hər dəfəsində zəhmətkeş insanlarının əməyi və təri ilə bu vəziyyətdən çıxıb. İndi də çıxacaq! Cümhurbaşqanı Rəcəb Təyyub Ərdoğanın “onların dolları varsa, bizim də xalqımız və Allahımız var” sözlərini məsxərəyə qoyanlar var. Bu, yalnız hörmətli Ərdoğanın sözləri və yanaşması deyil. Ağlı başında olan hər vətənpərvər türk anlayır ki, bu gün Amerikanın istəyi qarşısında güzəştə gedilsə, sabah başqa 8-9-10 və sayı artan şərtlər gələcək".

A.Əliyev həmçinin Azərbaycanda özünü müxalif adlandıran bir neçə ekspertin “Azərbaycan Türkiyədən sərmayəsini geri çəksin” fikirlərinə də münasibət bildirib: "Azərbaycan bu “ekspertlərin” dediyi kimi etsə, Türkiyəyə arxa çevirmiş olar, bu isə nə qardaşlığa, nə də strateji müttəfiqliyə uyğundur! Azərbaycanın Türkiyədən sərmayəsini geri çəkməsi nə siyasi, nə də iqtisadi maraqlarımıza uyğundur. Dövlət Neft Şirkəti Türkiyədəki neft və kimya sənayesinə milyardla dollar yatırım qoyub. Bir neçə aydan sonra Star zavodunun möhtəşəm açılışı olacaq. Bu zavoda Dövlət Neft Şirkəti 6 milyard dollardan çox yatırım qoyub. Görəsən, həmin o “ekspertlər” Azərbaycanın həmin zavoddan imtinasını necə təsəvvür edirlər? Star hər iki ölkəyə gələcək illərdə milyardlarla dolar gəlir gətirəcək. “Sərmayəmizi geri çəkək” təklifləri düşmənlərimizin xeyrinədir. Düşmənlərimiz çox arzu edir ki, Türkiyə-Azərbaycan ittifaqı sarsılsın. Sərmayəmizin geri çəkilməsi məhz ittifaqın zəifləməsinə hesablanıb. Bir neçə il əvvəl Azərbaycan manatı da devalvasiyaya uğramışdı. Məgər onda Türkiyə Azərbaycandakı milyardlarla dolar sərmayəsini gerimi çəkdi? Biz də çəkməməliyik. Atalarımız yaxşı deyib, dost və qardaş dar gündə daha yaxşı tanınar! Biz dostumuzu və qardaşımızı darda qoyan xalqlardan deyilik! Türkiyə Allahın və xalqının zəhməti ilə bu çətinliyi də adlayacaq!"