II İlya Allahşükür Paşazadəni təbrik etdi

Avqustun 29-30-da Tbilisdə yubiley mərasimi təşkil ediləcək

Ümumgürcüstan Patriarx-Katolikosu II İliya Şeyxülislam Allahşükür Paşazadəyə telefonla zəng edərək 65 illik yubileyi ilə bağlı səmimi qəlbdən təbrik edib, ən xoş arzularını bildirib. Qafqaz Müsəlmanları İdarəsindən Teleqraf.com-a verilən məlumata görə, gürcü xalqının dini lideri A.Paşazadəni yaxın günlərdə qardaş Gürcüstan torpağında salamlamaq və şəxsən təbrik etmək fürsətini səbirsizliklə gözlədiklərini dilə gətirib.

Qeyd edək ki, ümumgürcüstan Katolikos-Patriarxı II İlya QMİ sədri Şeyxülislam Allahşükür Paşazadəni Gürcüstana səfərə dəvət edib.

Avqustun 29-30-da baş tutacaq səfər çərçivəsində Qafqaz müsəlmanlarının ali dini lideri Şeyxülislam A.Paşazadənin anadan olmasının 65-ci ildönümü Gürcüstanda qeyd ediləcək.

Bu münasibətlə Tbilisidə xüsusi toplantı və təntənəli yubiley tədbirinin keçirilməsi, habelə Gürcüstan rəsmiləri tərəfindən qəbullar nəzərdə tutulur. Yubiley tədbirlərində iştirak etmək üçün Şeyxülislamla birlikdə Milli Məclisinin deputatları, Azərbaycandakı xristian və yəhudi dini icma başçıları, ictimai xadimlər Gurcüstana səfər edəcəklər.

BƏXTİYAR