Hesablama Palatası hesabat verir - Milli Məclisdə

Milli Məclisin yaz sessiyasının növbəti plenar iclası başlayıb.

Teleqraf.com xəbər verir ki, iclasda Hesablama Palatasının hesabatı müzakirə edilib.

Palatanın sədri Vüqar Gülməmmədov deyib ki, 2018-ci il Azərbaycan üçün əlamətdar olub: “Prezident İlham Əliyev prezident seçilib, habelə Azərbaycan Demokratik Respublikasının 100 illiyi qeyd edilib.

2018-ci ildə dövlət büdcəsinin xərclənməsinə nəzarət həyata keçirilib. Bu müddətdə 58 yoxlama nəzarət tədbiri keçirilib, bunun 53-ü audit tədbirləri olub. Maliyyə hesabatları ətraflı təhlil edilib. Maliyyə inzibatçılıq sahəsində mövcud olan nöqsanlar 53 audit tədbirləri ilə aşkar edilib. Ümumilikdə 2018-ci ildə 714 nöqsan aşkar edilib. Kollegiya qərarlarından nöqsanların aradan qaldırılmasının vacibliyi qeyd edilib".

O, qeyd edib ki, hesabat ilində 9 iş hüquq-mühafizə orqanlarına göndərilib. Bu işlərdən 4-ü inzibati, 5-i isə cinayət xarakterli olub. Onun sözlərinə görə, 2018-ci ildə Hesablama Palatasına vətəndaşların müraciəti əvvəlki illə müqayisədə çox olub və bu da müsbət hadisədir.

2018-ci ildə Hesablama Palatası iki xarici ölkə auditi ilə əməkdaşlıq müqaviləsi imzalayıb.
Hazırda hesabatın təqdimatı davam edir.