Formula 1 SOCAR Azərbaycan Qran Prisi başladı - Foto

Bakıda Formula 1 SOCAR Azərbaycan Qran Prisinin birinci sərbəst yürüşü başlayıb.

Teleqraf.com-un məlumatına görə, yürüşdə hər biri iki pilotdan ibarət 10 komanda iştirak edir.

“Mercedes” komandasının heyətində Luis Hemilton və Valtteri Bottas, “Ferrari”də Sebastyan Fettel, Çarles Lekler, “Williams”da isə Corc Russell və Ronert Kubitsa yarışırlar.

“Red Bull Racing” komandasında Ryer Qasli, Maks Ferstappen, “Raching Point”də Serxio Peres və Lens Stroll, “Renault”da isə Niko Hulkenberq ilə Daniel Rikkardo mübarizə aparırlar.

Bundan başqa, “Toro Rosso”nun heyətində Aleksandr Albon və Daniil Kvyat, “Alfa Romeo”da Antonio Covinatsi, Kimi Raykonnen, “McLaren”də Lando Norris və Karlos Sayns yürüşdə iştirak edirlər.

Pilotlar Roman Qrojan və Kevin Maqnussen isə “Haas” komandalarını təmsil edirlər.

Yürüş iştirakçıları 1,5 saat ərzində 6 kilometrlik Bakı trekində yarışacaqlar. İkinci sərbəst yürüşə isə saat 17:00-da start veriləcək.

Xatırladaq ki, Formula 1 Bakıda 2016-cı ildən keçirilir. Şəhər trasının uzunluğu 6 kilometrdən bir qədər çoxdur. Trekin ən geniş sahəsi 13 metr, ən dar hissəsi isə İçərişəhər yaxınlığında, yeddi və səkkizinci döngələrdir – 7,6 metr. Start və finiş xətti “Azadlıq” meydanındadır.

2016-cı ildə “Williams” komandasının pilotu Valtteri Bottas tərəfindən Bakıda Formula 1 yarışlarının sürət rekordu qeydə alınıb – 378 km/saat.

Azərbaycanda Qran Priyə tamaşa etmək üçün daha çox Rusiya, Böyük Britaniya, Gürcüstan, Niderland, Polşa, BƏƏ və Finlandiya vətəndaşları səfər edirlər.