“Bu vəsaitlər büdcəyə daxil olmur” - Fazil Mustafa

Dayancaqlarda avtomobilin 24 saat saxlanılmasına görə rüsum ödənilməsi normal haldır. Ancaq diqqət edək görək Azərbaycanda saxlanılma hansı meyarlar əsasında aparılır.

Teleqraf.com xəbər verir ki, bu sözləri Milli Məclisdə çıxış edən deputat Fazil Mustafa “Yol hərəkəti qaydaları” haqqında qanunun müzakirəsi zamanı deyib.

Deputat əlavə edib ki, dayanacaqlarda yığılan pullar büdcəyə daxil olmur:

“Maraqlıdır, hava limanı və avtovağzala giriş üçün vəsait ödənilir. Xarici ölkələrdə hava limanına və ya avtovağzala 20-30 dəqiqə girib-çıxanlar rüsum ödəmirlər.

Hesab edirəm ki, bizim hava limanına da 20-30 dəqiqə girib çıxan insanlar da ödəniş etməməlidir. Xüsusilə, nəzərə almaq lazımdır ki, hava limanına metro işləmir, insanlar məcburdur ora taksi və ya şəxsi nəqliyyatla getsin. İnsanlar kimisə yola salmaq və ya qarşılamaq məqsədilə qısa müddətə hava limanına daxil olursa, ondan rüsum alınmamaılıdır. İndiki halda tətbiq edilən doğru hüquqi mexanizm deyil”.

Deputat əlavə edib ki, rüsumlarla bağlı da məsələdə bəzi problemlər var və onlar həll etmək lazımdır: “İnsanlar viza almaq məqsədilə səfirliklərə müraciət edir. Bu, daha çox Şengen vizası ilə bağlı məsələdir. Həmin qurumlar ilkin araşdırma zamanı bilir ki, viza verilməyəcək, amma ödənilən rüsumlar mənimsənilir.

Hesab edirəm ki, sənəd verəndə ilkin araşdırma aparılmalı və vətəndaşa bildirilməlidir ki, ona viza verilməyə bilər”.