"Bu çağırışın hazırkı hərbi vəziyyətlə bağlılığı yoxdur" - Zaur Abdullayev

Məlum olduğu kimi Azərbaycan Prezidenti, Silahlı Qüvvələrin Ali Baş Komandanı İlham Əliyevin avqustun 26-da imzaladığı sərəncama əsasən oktyabr çağırışına başlanılıb. Hazırda aparılan müddətli həqiqi hərbi xidmətə çağırış qanunvericiliyə uyğun olaraq hər il olduğu kimi ildə 4 dəfə həyata keçirilən bir prosesdir.

Teleqraf.com xəbər verir ki, bunu Səfərbərlik və Hərbi Xidmətə Çağırış üzrə Dövlət Xidməti rəisinin birinci müavini, general-mayor Zaur Abdullayev bu gün keçirilən brifinqdə deyib.

Onun sözlərinə görə, bu çağırışın hazırkı hərbi vəziyyətlə heç bir bağlılığı yoxdur:

"Həmişə olduğu kimi 18 yaşı tamam olmuş və möhlət hüququ olmayan gənclər qanunvericiliyə uyğun olaraq Vətən qarşısında borclarını yerinə yetirmək üçün əsgəri xidmətə yola salınırlar. Gənc əsgərlər cəbhəyə deyil, müvafiq qoşun növlərinin hərbi hissələrinə - təlim mərkəzlərinə göndərilir və qarşıdakı 3 ay müddətində onlarla orada təlimlər keçiriləcək, hərbin sirləri öyrədiləcək, sonra xidmətlərini təyin olunduqları yerlərdə davam etdirəcəklər".

Zaur Abdullayev qeyd edib ki, oktyabrın 30-dək davam edəcək müddətli həqiqi hərbi xidmətə çağırış normal prosedur qaydadır: "Yəni plana uyğun olaraq aparılır.
Ali Baş Komandanın müvafiq Sərəncamı ilə ölkəə qismən səfərbərlik elan edilib. Qeyd edim ki , qismən səfərbərliklə bağlı planda nəzərdə tutulandan daha çox on minlərlə vətəndaş Xidtin Aparatına və yerli struktur bölmelerinə müraciət edərək ərazi bütövlüyümüz uğrunda döyüşlərdə iştirak etmək istədiklərini bildirirlər. Vətəndaşların bu ruh yüksəkliyi və çoxsaylı müraciətlərinin nəticəsidir ki, proses uğurla həyata keçirilir və onlar təlimlerə cəlb edilirlər. Biz, Səfərbərlik və Hərbi Xidmətə Çağırış üzrə Dövlət Xidməti olaraq yüksek vətənpərvərlik nümayiş etdirərək döyüşlərə könüllü qatılmaq arzusunda olan çoxsaylı vətəndaşlarımıza bir daha təşəkkürümüzü bildiririk".