“Əmanətlərin sığortalanması haqqında” qanuna dəyişiklik edildi

Parlamentin bu gün baş tutan plenar iclasında “Əmanətlərin tam sığortalanması haqqında” qanuna dəyişiklik layihəsi birinci oxunuşda müzakirəyə çıxarılıb.

Teleqraf.com bildirir ki, təklif edilən dəyişikliklərə görə, qanunun qüvvədə olma müddətinin 5 aprel 2021-ci il tarixinə qədər artırılması nəzərdə tutulub.

Qeyd edək ki, “Əmanətlərin tam sığortalanması haqqında” qanun 4 mart 2016-cı ildə, 3 il müddətinə qəbul edilib. Məqsəd manatın 2015-ci ildəki iki dəfə devalvasiyasından sonra, banklardan əmanətlərin geri götürülməsinin qarşısını almaq olub. Ötən il martın 4-də Milli Məclis qanunun qüvvədə olma müddətini 1 il, bu il martın 13-də isə daha 9 ay uzadıb.

Deputat Əli Məsimli qanun layihəsinin vacib olduğunu bildirib. Qeyd edib ki, bu addımlar ölkədə iqtisadi fəallığın qorunmasına xidmət edir. O, deputatları layihəni dəstəkləməyə dəvət edib. Layihə I oxunuşda qəbul edilib.