“Nazirlər, hakimlər də and içsinlər” - Deputatdan təklif

“Prezidentin yüksək vəzifə tutan bir neçə hökümət üzvünü tənqid etməsi cəmiyyətdə böyük əks-səda doğurdu. Ötən illər ərzində üç nazirin və yeddi icra başçısının cəzalandırılması, 2015-ci ildə MTN-in ləğvi, iqtisadiyyat, sosial və nəqliyyat sahələrində, o cümlədən 2019-cu ildə hər üç hakimiyyət qolunda əsaslı dəyişikliklərin aparılması ilə dövlət başçısının kadrlara münasibətdə həmişə sərt tələblərlə yanaşdığını sübut edir”.

Teleqraf.com xəbər verir ki, bunu parlametin iclasında çıxış edən deputat Zahid Oruc bildirib.

Komitə sədrinin sözlərinə görə, indi Şuşa və bütün Qarabağ hər bir hakmiyyət təmsilçisinin fəaliyyətini qiymətləndirmək üçün bir barometrə çevrilib: “Lakin bir qism siyasət, media və sosial şəbəkə adamlarının dövlət başçısının məqsədlərini təhrif edərək “bütün məmurlara nifrət” yağdırması, ölkəmizi məğlub Ermənistanın hakimiyyəti ilə az qala bir sırada göstərməsi yolverilməzdir. Əlbəttə, kimsə külli miqdarda dövlət vəsaitini mənimsəyibsə, o, əməllərinə cavab verəcək. Lakin yüksək çinli şəxsləri tənqid edərkən on illər ərzində əldə olunan bütün uğurları inkar etmək, xüsusilə də Vətən müharibəsində qələbəmizə zərbə vurmaq qəbuledilməzdir. Üç-beş nazir dövlət demək deyil.

Dünyada belə analogiya yoxdur. Bir nazir ucbatından on minlərlə dövlət qulluqçusunu oğru, quldur, talançı adlandıranlar Qarabağ məsələsi həll olunduğu üçün son silaha əl atıblar: məmur məsələsi!

Prezident tarixi Qələbədən sonra Yeni Hakimiyyət quruculuğunu davam etdirir. Bu qətiyyən parçalanma, qütbləşmə, iqtisadi maraqlar mübarizəsi deyil. Prezidentin xarakteri və idarəçilik siyasətini izləyənlər bilir ki, o, millətin iradəsini, ictimai fikri öz siyasətində nəzərə alır, lakin dövlət vəzifələrinə təyinatları, yaxud çıxarılmalar küçə və meydanların, virtual aləmin təzyiqi altında həyata keçirmir.

Müqayisə üçün, Mixail Saakaşvili bir neçə il ərzində hökuməti 4 dəfə dəyişmişdi və hamı onu sovet mirasını ləğv edib xalq hakimiyyətini quran lider adlandırırdı. İndi informasiya məkanımızda tüğyan edən “köhnələr və yenilər", "xaricdə təhsil alanlar və yerli diplom daşıyıcıları", "rusofillər", yaxud "qərbpərəstlər", "5-ci", yoxsa "6-cı kolon təmsilçiləri” bölgülərini dövriyəyə çıxaranların iki məqsədi var:

Birincisi, 30 il əvvəl partiya-sovet rəhbərlərini və dövlət aparatını iflic etdikləri kimi, müharibəni qazanan bir hakimiyyətin resurslarını xarici hədəflərdən çəkindirib daxildə artan gərginliyə və süni qarşıdurmalara yönəltmək.

İkincisi, Prezidentin Yeni Hakimiyyət quruculuğunun qarşısını almaq!".

Deputat dövlət başçısının tənqidinin hamı üçün bir siqnal olduğunu xatırladıb:

"Ona görə də təklif edirəm ki, Amerikanın dövlətçilik ənənəsində əsrlərdir davam edən, bizdə də siyasi vəzifə tutan nazirlər də hakimlər dövlət qulluqçuları kimi and içsinlər. Eyni zamanda, Dövlət Qulluğuna dair Yeni Məcəllə qəbul edilsin.

Əslində “Dəmir yumruq” yalnız 44 gün üçün deyil. O, “Qalib əl” həmişə qüvvədə olacaq: Qarabağa “Böyük qayıdış”da da, təmiz-şəffaf idarəçiliyin və ictimai ədalətin bərqərar olunmasında da!”.