Zaxarova erməni jurnalistə qəzəbləndi: “Bu sualı özünüzə verin”

“Bu sualı Ermənistan hakimiyyətinə ünvanlamısınızmı?”

Teleqraf.com xəbər verir ki, bunu Rusiya Xarici İşlər Nazirliyinin sözçüsü Mariya Zaxarova Ermənistan və Azərbaycanla danışıqlarda “xalqların öz müqəddəratını təyinetmə hüququ”nun niyə nəzərə alınmaması ilə bağlı erməni jurnalistin sualına cavabında deyib.

Jurnalist müvafiq sualı verərkən iddia edib ki, Ermənistan ölkələrin ərazi bütövlüyünü dəstəkləyən Almatı bəyannaməsini imzalayarkən “Dağlıq Qarabağ”ı nəzərə almayıb.

“Sergey Viktoroviç Lavrov mətbuat konfransında bütün nüansları, bütün vurğuları izah etdi. Əlavə ediləcək bir şey yoxdur. Həmin sözlərlə kimsə bu sualı hakimiyyətə ünvanlasın ki, dövlətin vahid mövqeyi bəlli olsun. Bundan sonra nəyisə müzakirə etmək olar. Son zamanlarda bəzi şeylərin müxtəlif cür yozulmasını, çox fərqli şərh edilməsini görürük. İrəvanın əsas rəsmi mövqeyini anlamaq istərdik”, - Zaxarova erməni jurnalistə cavabında bildirib.

Qeyd edək ki, bundan əvvəl Rusiya xarici işlər naziri Sergey Lavrov Azərbaycan və Ermənistanın 1991-ci il Almatı bəyannaməsi və BMT Nizamnaməsi ilə bir-birinin ərazi bütövlüyünü tanıdığını bildirmişdi. Onun sözlərinə görə, Ermənistan bununla Qarabağın Azərbaycanın bir hissəsi olduğunu tanıyıb.