Müdafiə naziri hərbçi həkimlərlə görüşüb

Müdafiə naziri general-polkovnik Zakir Həsənov Silahlı Qüvvələrin Baş Klinik Hospitalında hərbi tibb xidmətinin rəhbər heyətinin ilin yekunlarına həsr olunmuş toplantısında iştirak edib.

Müdafiə Nazirliyindən Teleqraf.com-a verilən məlumata görə, Z.Həsənov və Tibb Baş İdarəsinin rəhbərliyi toplantıdan əvvəl ümummilli lideri Heydər Əliyevin hospitalın həyətində ucaldılmış büstünü ziyarət edərək önünə gül dəstələri qoyub və xatirəsini ehtiramla yad ediblər.

Sonra toplantını giriş sözü ilə açan Müdafiə Nazirliyi Tibb Baş İdarəsinin rəisi general-mayor Natiq Əliyev son bir il ərzində qoşunlarda şəxsi heyətin döyüş hazırlığı və sosial-məişət şəraitinin səviyyəsinin yaxşılaşdırılması, hərbi tibb müəssisələrinin müasir avadanlıqlarla təchiz edilməsi, müayinə və müalicə işinin təkmilləşdirilməsi və digər həyata keçirilən tədbirlərin vacibliyini qeyd edərək müdafiə nazirinə bu sahəyə göstərdiyi diqqətə görə görüş iştirakçıları adından minnətdarlığını bildirib.

Z.Həsənov toplantıda çıxış edərək SQ-nin döyüş qabiliyyətinin möhkəmləndirilməsi məqsədilə aparılan irimiqyaslı quruculuq işlərinin ölkə rəhbərliyinin, şəxsən Prezident, Ali Baş Komandan İlham Əliyevin diqqət mərkəzində olduğunu xüsusilə vurğulayıb.

2015-ci tədris ili üçün qarşıda duran vəzifələrdən danışan müdafiə naziri bu gün dövlət rəhbərliyinin əsas məqsədinin SQ-nin döyüş qabiliyyətinin daha da gücləndirilərək torpaqlarımızın işğaldan azad ediməsi vəzifəsinin yerinə yetirilməsindən ibarət olduğunu qeyd edib. Məhz bu sahədə tibb xidməti zabitlərinin də üzərinə düşən məsuliyyətin artırılmasını, hər bir hərbi tibb müəssisəsi rəhbərliyinin xidmət etdiyi hərbi bölmənin döyüş qabiliyyətinin möhkəmləndirilməsinə töhfə verməsini diqqətə çatdırıb.

Görüşün sonunda Z.Həsənov tibb zabitlərinin hərbi təbabətin aktual sahələri ilə bağlı suallarını ətraflı cavablandırıb və bir sıra məsələlərə aydınlıq gətirib.

Sonra Azərbaycan Tibb Universiteti Hərbi Tibb fakültəsinin əsaslı təmir olunmuş qərargah və yataqxanasına baxış keçirən müdafiə naziri görüləcək işlərlə bağlı tövsiyə və tapşırıqlarını verib.

BƏXTİYAR