Rusiyaya qarşı müqavimət güclənir: “Cənubi Qafqazdan çıxarıla bilər”

“Rusiya Cənubi Qafqazdan çıxarıla bilər, amma bunun ehtimalı çox da yüksək deyil”.

Teleqraf.com xəbər verir ki, bunu rusiyalı politoloq Sergey Markedonov deyib.

Onun fikrincə, Rusiyanın Cənubi Qafqazdan qovulması ehtimalı istisna deyil, Moskva bunun qarşısını almaq üçün çox çalışmalıdır.

Markedonov Ermənistanın Qərblə yaxınlaşmasına da diqqət çəkib və qeyd edib ki, İrəvanın bu cəhdləri 2022-ci ildən başlamayıb:

“2001-ci ildə Qərbin özünü göstərməyə çalışdığı, Ermənistanın müraciət etdiyi məşhur Ki-Uest konfransını xatırlaya bilərik. Eyni zamanda, ABŞ və Fransada böyük erməni diasporu var. İndi bu kəmiyyət parametrləri müəyyən keyfiyyətə çevrilir”.

Digər rusiyalı siyasi ekspert Dmitri Yeqorçenqov Markedonovun nöqteyi-nəzərini müdafiə edərək deyib ki, hələlik Rusiyanın bu gün və ya sabah Cənubi Qafqazdan sıxışdırılacağına dair heç bir sübut yoxdur:

“Bunun qarşısını almaq üçün birgə səy göstərsək, bu baş verməyəcək. Ermənistanın indi Avropa və Amerika platformalarından əvvəlkindən daha fəal istifadə etməsində heç bir qəbahət görmürəm. Ermənistanla Azərbaycan arasında davamlı sülhə nail olmaq üçün bütün imkanlardan istifadə edilməlidir”.

Onun sözlərinə görə, əgər ABŞ dövlət katibi Entoni Blinken sülh prosesinə kömək edə bilərsə, bunda qəbahət yoxdur: “Əsas odur ki, bu müsbət şeylər Qərbin o regiona gətirdiklərindən diqqəti yayındırmasın. Əgər orada nəsə strateji qarşılıqlı fəaliyyət Rusiyanın xeyrinə deyilsə, bunların hamısını araşdırmaq yaxşı olardı”.