MSK 3 bələdiyyə üzrə səslərin təkrar sayılmasına qərar verdi

Mərkəzi Seçki Komissiyasının (MSK) bu gün keçirilən iclasında dekabrın 23-də keçirilmiş bələdiyyə seçkiləri ilə bağlı daxil olmuş müraciətlərə baxılıb.

İclasda 75 saylı Lənkəran-Masallı seçki dairəsində Türkoba bələdiyyəsi üzrə 29 saylı seçki məntəqəsində, 75 saylı Lənkəran-Masallı seçki dairəsində Gəgiran bələdiyyəsi üzrə 15 və 19 saylı seçki məntəqələrində, 76 saylı Lənkəran-Astara seçki dairəsində Səpnəkəran bələdiyyəsi üzrə 11 və 12 saylı seçki məntəqələrində, 95 saylı Tərtər seçki dairəsində Mamırlı bələdiyyəsində 22 saylı seçki məntəqəsində, 66 saylı Biləsuvar seçki dairəsində Ağalı kənd bələdiyyəsi üzrə 29 və 30 saylı seçki məntəqələrində, 71 saylı Masallı kənd seçki dairəsində Qızılağac kənd bələdiyyəsi üzrə məntəqələrdə, 57 saylı Kürdəmir seçki dairəsində Şirvan bələdiyyəsi üzrə 21 saylı seçki məntəqəsində, 119 saylı Ağdam kənd seçki dairəsində Farzalı bələdiyyəsi üzrə məntəqələrdə namizədlərin qanun pozuntularının aradan qaldırılması, nəticələrin ləğvi, səslərin yenidən sayılması və protokolların namizədlərə verilməsi barədə müraciətlərinin baxılması üçün müvafiq dairə seçki komissiyalarına göndərilməsi barədə qərarlar qəbul edilib.

82 saylı Ağcabədi seçki dairəsində Şənlik kənd bələdiyyəsi üzrə bəzi məntəqələrdə seçki protokollarının saxtalaşdırılması barədə iddia da baxılması üçün müvafiq DSK-ya göndərilib.

MSK 72 saylı Yardımlı-Masallı seçki dairəsində Şıxlar bələdiyyəsi üzrə 81 və 82 saylı seçki məntəqələrində, 92 saylı Zərdab-Ucar seçki dairəsində Körpü kənd bələdiyyəsi üzrə seçki məntəqələrində, 107 saylı Qazax seçki dairəsində Birinci Şıxlı kənd bələdiyyəsi üzrə məntəqələrdə səslərin təkrar hesablanması barədə qərar qəbul edib. Namizədlərin şikayətlərindəki digər məqamların isə müvafiq DSK-larda araşdırılması zəruri sayılıb.

Qeyd edək ki, MSK-nın qərarı ilə bələdiyyə seçkiləri ilə bağlı dövlət büdcəsindən ayrılmış vəsaitin daxil olması və xərclənməsi barədə məntəqə seçki komissiyalarının maliyyə hesabatının dairə seçki komissiyalarına (DSK) təqdim edilməsi üçün ayrılmış müddət sabah başa çatır. Belə ki, Seçki Məcəlləsinin 96.6-cı maddəsinin tələbinə əsasən səsvermə günündən sonra 5 gün müddətində məntəqə seçki komissiyaları maliyyə hesabatını DSK-lara təqdim etməlidir.

Bələdiyyə seçkiləri ilə bağlı məntəqə seçki komissiyaları maliyyə hesabatını dekabrın 28-dək DSK-lara təqdim etməlidirlər. Dövlət büdcəsindən ayrılmış vəsaitin daxil olması və xərclənməsi barədə dairə seçki komissiyalarının maliyyə hesabatının MSK-ya təqdim edilməsi üçün isə 2015-ci il yanvarın 2-dək vaxt ayrılıb. Seçki Məcəlləsinin 96.7-ci maddəsinə əsasən DSK-lar səsvermə günündən sonra 10 gün müddətində maliyyə hesabatını MSK-ya təqdim etməlidir.

Səxavət