Paşinyan anonsu verdi - “Bu dəfə də dediyinin ardını gətirməsə...”

“Paşinyanın vəzifəsi xalqını Azərbaycanın ərazi bütövlüyünə və Qarabağı Azərbaycan ərazisi kimi tanımağa hazırlamaqdır”.

Teleqraf.com xəbər verir ki, bunu politoloq Elxan Şahinoğlu deyib.

Ekspert Ermənistan rəhbərinin Azərbaycanla bağlı son çıxışına diqqət çəkib:

“Ermənistan Baş naziri Nikol Paşinyan parlamentdə son çıxışı zamanı ölkəsinin iki qonşusu – Türkiyə və Azərbaycanla münasibətlərin normallaşdırılması vacibliyindən danışıb. O, bunu İkinci Qarabağ Müharibəsindən sonra bir neçə dəfə söyləyib. Ona görə də Paşinyanın bu cümləsində qeyri-adi heç nə yoxdur, təkrarlanan fikirlərdir, sadəcə dediklərini reallaşdırmır.

Paşinyanın çıxışında digər iki fikir diqqətimi cəlb edib. Birinci cümləsində deyib ki, hökumətin əsas vəzifəsi xalqı ağrılı və güzəştli qərarlara hazırlamaqdır. Onun ikinci cümləsi isə təxminən belədir: “Ermənistanın inkişafının başqalarına qarşı istifadəsiylə barışmayacaqlar”.

Bu iki cümlə Azərbaycanla bağlıdır və bu mənada Paşinyan haqlıdır. Paşinyanın vəzifəsi xalqını Azərbaycanın ərazi bütövlüyünə və Qarabağı Azərbaycan ərazisi kimi tanımağa hazırlamaqdır. Əslində müharibədən məğlubiyyətlə ayrılan Paşinyana yenidən səs verən susqun çoxluq Qarabağı Azərbaycan ərazisi kimi tanımağa çoxdan hazırdır.

İkinci fikri də reallığı əks etdirir ki, Azərbaycan Ermənistanın hərbi gücünün artmasının yenidən bizə qarşı istifadəsinə seyirçi qalmayacaq. Gərək Ermənistan Azərbaycan və Türkiyə ilə yazılı anlaşmalarla sülh əldə etsin ki, inkişafı ehtimalı heç kimə mane olmasın.

Paşinyan parlamentində ötənilki çıxışında da başqa bir etiraf etmiş, Ermənistanın Qarabağ yükünü daşımadığını bildirmişdi. Ancaq bu çıxışından sonra addım atmadı. İndi də lazımi sözlər deyib, bu dəfə də ardını gətirməsə, özünün də dediyi kimi ölkəsi gərginlikdən qurtula bilməyəcək”.