Xəzərin hüquqi statusu üzrə növbəti iclasın vaxtı məlum oldu

“Xəzər dənizinin hüquqi statusunun müəyyənləşdirilməsi üzrə Xəzəryanı dövlətlərin XİN rəhbərlərinin müavinləri səviyyəsində işçi qrupun növbəti iclası sentyabrın əvvəlində Moskvada keçiriləcək”.

Bunu Trend-ə eksklüziv müsahibəsində İran xarici işlər nazirinin Asiya və Okeaniya ölkələri üzrə müavini və İranın Xəzər məsələləri üzrə xüsusi nümayəndəsi İbrahim Rəhimpur deyib.

İ.Rəhimpur bildirib ki, hüquqi statusun müəyyənləşdirilməsi ilə bağlı bir çox məsələlər artıq razılaşdırılıb. Onun sözlərinə görə, Xəzərin hüquqi statusu ilə bağlı bəzi önəmli məqamlar qalıb ki, tərəflərin hamısı eyni fikirdə deyil:

“Müzakirələr davam etdirilir və ümid edirik ki, müzakirələrin nəticəsi müsbət olacaq”.

İran XİN rəsmisi vurğulayıb ki, Xəzər dənizində təhlükəsizlik tam təmin olunub və Xəzərin sərvətlərindən də 5 ölkənin xalqları yararlanırlar:

“Ölkələr hüquqi statusun müəyyənləşdirilməsi üçün qalan məsələləri müzakirələri davam etdirəcəklər”.

O qeyd edib ki, Xəzər dənizi sülh və 5 ökə arasında dostluq dənizidir. İ.Rəhimpurun sözlərinə görə, 20 ildir ki, müzakirələr davam etdirilir və əlbbətdə bu müzakirələr böhranlı məsələlər üzrə müzakirələr deyil:

“Ona görə ki, Xəzər dənizindən bütün ölkələr bəhrələnir, dənizdə gediş-gəliş edir, gəmiçilik edir, dənizin sərvətlərindən istifadə edirik. Qərara alınıb ki, hələlik 1921 və 1940-cı illərin müqavilələrini əvəz edəcək etibarlı və 5 ölkəni qane edəcək müqavilə əldə olunmayanadək bu, belə də davam etsin”.