Qarabağ həqiqətləri ilə bağlı internet mediada monitorinq keçirilib

Bu gün Müstəqil Jurnalistlərə Texniki və Hüquqi Yardım İctimai Birliyi QHT-lərə Dövlət Dəstəyi Şurasının dəstəyi ilə həyata keçirdiyi “İnternet media resurslarından istifadədə Qarabağ həqiqətlərinin düzgün təbliği layihəsi” çərçivəsində dəyirmi masa keçirib.

Teleqraf.com-un məlumatına görə, layihə çərçivəsində internet media resurslarında Qarabağ münaqişəsi ilə bağlı yazıların monitorinqi barədə hesabat təqdim olunub.

Birliyin sədri Asəf Quliyev bildirib ki, internet media resurslarında Qarabağ mövzusunun işıqlandırılması ilə bağlı iki ay müddətində Qafqazinfo.az, Lent.az, Axar.az, Modern.az saytlarının monitorinqi, feysbuk sosial şəbəkəsində isə müəyyən müşahidələr aparılıb.

Monitorinqi təşkil edilən saytlar oxucu çoxluğu və mövzuya həssaslıq meyarları ilə seçilib.
Nəticələrə görə Qafqazinfo.az-da 6092 ümumi materialdan 95-i, Lent.az-da 7023 materialdan 197-si, Axar.az-da 6246 materialdan 170-i, Modern.az-da 4188 materialdan 208-i Qarabağ münaqişəsinə həsr edilib. Ümumilikdə isə 670 material bu mövzuya aid olub.

Yekun nəticələrə əsasən, cəbhə materiallarının əsasən rəsmi informasiyalara əsaslanaraq hazırlanması, müharibə tarixi ilə bağlı yazıların hazırlanması, sosial şəbəkələrdən Qarabağ mövzusunda informasiyaların rəsmi saytlara yol tapmaması müsbət qiymətləndirilib.

Bundan başqa, saytlarda erməni mənbələrinə heç bir aydınlaşdırma olmadan istinad hallarının hələ də qalması, alternativ mənbələrdən istifadənin çox az olması, sosial şəbəkələrdə milli maraqlara cavab verməyən informasiyaların az da olsa qalması mənfi qiymətləndirilib və bildirilib ki, bəzi hallarda rəsmi qaynaqlar informasiyanı gecikdirdiyi üçün Azərbaycan KİV-ləri erməni mənbələrinə müraciət etməli olur.

BƏXTİYAR