Biznesmen borca görə ailə üzvlərini güllələdi – Dəhşətli ailə dramı

Rusiyanın Krasnoyarsk vilayətində dəhşətli ailə dramı baş verib. Borca düşən biznesmen əvvəl həyat yoldaşını və uşaqlarını odlu silahla qətlə yetirib. Daha sonra isə özü intihar edib.

Teleqraf.com TASS-a istinadən xəbər verir ki, hadisə Kuraqinsk rayonunda baş verib. Polis faktı təsdiqləyib.

Cəsədləri yanvarın 23-də biznesmenin anası onlara gedən zaman aşkar edib. O, 39 yaşlı oğlunun, 38 yaşlı gəlininin, 17 və 9 yaşlı nəvələrinin cəsədini aşkar edib.

Qohumların verdiyi məlumata görə, biznesmenin maddi problemləri olub.

İstintaqdan bildiriblər ki, kişi əvvəlcə yatan ailə üzvlərini öldürüb: “Sonra isə özü intihar edib. Hazırda ballistik ekspertiza aparılır. Cəsədlər ekspertiza üçün morqa aparılıb".

LifeNews-un məlumatına görə, öldürülən qadın hamilə olub. Biznesmenin ağac tədarükü ilə məşğul olduğu qeyd edilib. Avadanlığı sıradan çıxan biznesmen kreditini ödəyə bilməyib.

Hadisə ilə bağlı istintaq davam edir.

Ramal