Yazıçı Əkrəm Əylisli saxlanıldı - YENİLƏNİB

12:36

Daxili İşlər Nazirliyinin mətbuat xidmətinin şöbə rəisi Orxan Mansurzadə Modern.az saytına yazıçı Əkrəm Əylislinin saxlanması faktını təsdiq edib.

“Hazırda araşdırma aparılır. Nəticə bəlli olduqdan sonra ictimaiyyətə məlumat veriləcək”.

Saat 12:11

Baş prokuroluqdan Teleqraf.com-a bildiriblər ki, Əkrəm Əylislini Dövlət Sərhəd Xidməti saxlayıb: "Əkrəm Əylislinin saxlanması ilə bağlı prokuroluq hər hansı göstəriş verməyib".

Yazıçı Əkrəm Əylisli Bakı hava limanında saxlanılıb.

Teleqraf.com-un məlumatına görə, o, bu gün səhər Venesiyada 30 mart – 2 aprel tarixlərində keçirilən “Incroci Di Civilta” Beynəlxalq ədəbiyyat festivalında iştirak etmək üçün ölkədən çıxmaq istəyib.

Əkrəm Əylisli saat 5:11-də 613 saylı reyslə uçmalı idi. Amma sərhədçilər onun ölkədən çıxışına qadağa qoyulduğunu bildiriblər.

Həyat yoldaşı Qalina Əylislinin “Turan” agentliyinə bildirdiyinə görə, yazıçıya ölkədən çıxışına qadağa qoyulduğu deyilib.

Qeyd edək ki, Əkrəm Əylislinin rus dilində qələmə aldığı və erməni-azərbaycanlı münaqişəsinə həsr olunmuş "Daş yuxular" romanı Azərbaycanda ciddi rezonans və etiraz doğurub. Əsərdə Azərbaycanın tarixi və siyasi coğrafiyası üçün təhlükə yaradan ermənilərə rəğbət hissi geniş müzakirələrə səbəb olub.

Əkrəm Əylisli Azərbaycan dilində bir sıra gözəl nəsr əsərlərinin müəllifi kimi də tanınıb.