Bakı sakini özündən 10 yaş böyük qardaşını bıçaqladı

Bakının Sabunçu rayonunda bıçaqlanma hadisəsi baş verib.

Teleqraf.com xəbər verir ki, hadisə rayonun Sabunçu qəsəbəsində qeydə alınıb.

Qəsəbə sakini Etibar Abbasov qəsəbənin ərazisində yerləşən parkda qardaşı İlqar ilə mübahisə edib. Mübahisə zamanı Etibar özündən 10 yaş böyük olan qardaşına çoxsaylı zərbələr vurub.

İlqar Abbasov dərhal 3 saylı Sabunçu şəhər xəstəxanasına çatdırılıb. Vaxtında tibbi yardım göstərildiyi üçün onun həyatını xilas etmək mümkün olub.

Hadisəni törədən Etibar Abbasov həbs edilib.

Etibar Abbasov ilkin dindirilmə zamanı bildirib ki, hadisədən əvvəl qardaşı ilə birlikdə kafedə içki məclisində olub. Bu zaman qardaşlar arasında mübahisə yaranıb.

Daha sonra qardaşlar şəxsi münasibətlər zəminində yaranan mübahisələrini kafeyə yaxınlıqda olan parkda davam etdiriblər. Sonda qanlı cinayət hadisəsi baş verib.

Faktla bağlı Cinayət Məcəlləsinin 29,120.1-ci (qəsdən adam öldürməyə cəhd) maddəsi ilə cinayət işi başlanıb.

Hacı Zeynalov