Moskvada nazirlərin iclası başladı - YENİLƏNDİ

Toplantıda Azərbaycanı xarici işlər naziri Elmar Məmmmədyarov təmsil edir

Rusiya paytaxtında Xəzəryanı ölkələrin xarici işlər nazirlərinin konfransı başlayıb. Beynəlxalq Ticarət Mərkəzində keçirilən konfransda Rusiyanın xarici işlər naziri Sergey Lavrov, Azərbaycanın xarici işlər naziri Elmar Məmmədyarov, Qazaxıstanın xarici işlər naziri Erlan İdrisov, Türkmənistanın xarici işlər naziri Rəşid Meredov və İranın xarici işlər naziri Məhəmməd Cavad Zərif iştirak edirlər.

Nazirlərin görüşündə bu ilin payızında Həştərxanda keçiriləcək Xəzər sammitinin gündəliyi, proqramı və yekun sənədləri müzakirə olunacaq. 2010-cu ildə Bakıda keçirilmiş sammitin qərarlarının yerinə yetirilməsi üzrə ekspertlər səviyyəsində görülən işlər təhlil ediləcək. Bunlar müasir tələblərə cavab verən yeni hüquqi statusun işlənib hazırlanması, təhlükəsizlik sahəsi və ümumi təhdidlərə qarşı mübarizə, ətraf mühitin mühafizəsi, bioehtiyatların qorunması və rasional istifadəsi, fövqəladə hallar barədə xəbərdarlıq və onların nəticələrinin aradan qaldırılması məsələləridir.

Qeyd edək ki, tədbir çərçivəsində Elmar Məmmədyarovun çıxışı və ikitərəfli görüşlər keçirməsi nəzərdə tutulub.

Sergey Lavrov: “Xəzərin statusuna dair danışıqlar üçün yeni müstəvilərin yaradılması işlərin effektivliyini yüksəldə bilər”

“Rusiya Federasiyası Xəzər problemlərinin müzakirəsi üçün yeni müstəvilərin yaradılmasına tərəfdardır”. Bunu Rusiyanın xarici işlər naziri Sergey Lavrov Xəzəryanı ölkələrin XİN rəhbərlərinin Moskvada keçirilən toplantısında deyib.

S.Lavrov bildirib ki, 2010-cu ildə Bakıda keçirilmiş III Xəzər sammiti zamanı dövlət başçıları Xəzərin hüquqi statusunun müəyyənləşməsi sahəsində bir sıra konkret vəzifələr müəyyənləşdiriblər. Bu vəzifələr akvatoriyanın delimitasiyasının perimetrlərinin işlənib hazırlanmasını, Xəzərdə təhlükəsizliyə dair sazişin həyata keçirilməsinə başlanmasını, nərəkimilərin ovlanmasına moratorium qoyulması üçün mexanizmin hazırlanmasını və müvafiq komissiyanın statusunun yüksəldilməsini nəzərdə tutur. S.Lavrov əlavə edib ki, nazirlərin görüşündə bu tövsiyələrin həyata keçirilməsinin gedişi müzakirə olunacaq və əsas istiqamətlər müəyyənləşəcək:

“Aydın olan budur ki, hamıya aid olan ümumi Transxəzər gündəmi qarşılıqlı fəaliyyət mexanizminin möhkəmlənməsini və mümkündürsə, aparılan işlərin effektivliyini yüksəltmək məqsədilə danışıqlar üçün yeni müstəvilərin yaradılmasını diktə edir”.

Qeyd edək ki, Moskvada Xəzəryanı ölkələrin xarici işləri nazirlərinin konfransı keçirilir.

Elsevər