“Sərkisyan bütün saxtakarlıqlara gedəcək ki, gücünü itirməsin” – ŞƏRH

“Ermənistan prezidenti Serj Sərkisyan noyabrın 26-da İrəvanda hakim Respublika Partiyasının qurultayında yenidən bu partiyanın sədri seçilib. Maraqlıdır ki, qurultaydan əvvəl Ermənistanın yeni baş naziri Karen Karapetyan və yeni müdafiə naziri Viqen Sərkisyan Respublika Partiyasına üzv olublar”.

Teleqraf.com xəbər verir ki, bunu “Atlas” Araşdırmalar Mərkəzinin rəhbəri, siyasi şərhçi Elxan Şahinoğlu bildirib. Analitik qeyd edib ki, hökumətin başqa üzvləri də hakim partiyaya üzv qəbul olunublar: “Bu Sərkisyan üçün vacib idi. Çünki, yeni baş nazir tərəfsiz qalsaydı, gələcəkdə Sərkisyana rəqib ola bilərdi. İndiki halda isə baş nazir partiya iearxiyasına görə də Sərkisyana tabe olacaq”.

Mərkəzi rəhbəri bildirib ki, aprel ayında Ermənistanda parlament seçkisi keçiriləcək və bu, konstitusiya dəyişikliyindən sonra Ermənistanda ilk seçki olacaq: “Bu seçkidən sonra Karapetyanın baş nazir vəzifəsində qalması problematikdir. Çünki yeni konstitusiyaya görə, baş nazir son 4 ili Ermənistanda yaşamalıdır. Karen Karapetyan isə uzun müddət Rusiyaya yaşayıb və işləyib. Bir neçə aydır Ermənistana qayıdıb. Bu durum Serj Sərkisyanın maraqlarına cavab verir. Çünki, parlament seçkisindən sonra Ermənistanda əsas səlahiyyətlər prezidentin deyil, baş nazirin əlində cəmləşəcək.

Respublika Partiyasının qələbəsi təmin olunduqdan sonra Serj Sərkisyan rahatlıqla baş nazir kreslosuna keçə bilər. 2012-c ilin parlament seçkisində Respublika Partiyası 131 mandatdan 69 mandat əldə etmişdi. Serj Sərkisyan seçkidə bütün saxtakarlıqlara gedəcək ki, parlamentdəki çoxluğu itirməsin”.

Səxavət