15 Fevral 2017 15:47
407

Ukraynanın sabiq prezidentləri – Leonid Kravçuk, Leonid Kuçma və Viktor Yuşşenko Bakıda bir araya gələcək. Sabiq prezidentlər martın 16-17-də keçiriləcək V Qlobal Bakı Forumunda iştirak etmək məqsədilə gələn ay Azərbaycana səfər edəcəklər. Bu barədə Teleqraf.com-a Diasporla İş üzrə Dövlət Komitəsindən məlumat verilib.

Nizami Gəncəvi Beynəlxalq Mərkəzinin üzvü olan Ukraynanın üçüncü prezidenti Viktor Yuşşenko Rusiyanın sabiq dövlət katibi və baş nazirin müavini Gennadi Burbulislə birgə forumda “Baltik-Qara dəniz təhlükəsizlik icmasının yaradılması: fəaliyyət planına doğru” adlı paneli təqdim edəcək. “Xarici əlaqələrin gələcəyi: güc və maraqlar” mövzusuna həsr olunan forumda transatlantik münasibətlərin gələcəyi, terrorizmlə mübarizə, beynəlxalq münasibətlərdə Çinin rolu və digər məsələlər müzakirə ediləcək.

V Qlobal Bakı Forumunu Diasporla İş üzrə Dövlət Komitəsinin yaxından dəstəyi ilə Nizami Gəncəvi Beynəlxalq Mərkəzi həyata keçirir. Forumda Latviyanın, Albaniyanın, Makedoniyanın, Monteneqronun və digər ölkələrin hazırkı prezidentləri, eləcə də bir sıra tanınmış ictimai-siyasi xadimlərin, elm adamlarının iştirakı planlaşdırılır.

Qeyd edək ki, V.Yuşşenko əvvəlki 4 forumda iştirak edib, L.Kravçukla L.Kuçma isə III Qlobal Bakı Forumuna qatılıb.

Səxavət


Müəllif: