Günəşlidə çökmə: bəzi evlərə ciddi ziyan dəyib

Suraxanı rayonunun Yeni Günəşli yaşayış sahəsində çökmə baş verib.

Bunu Teleqraf.com-a açıqlamasında Ekologiya və Təbii Sərvətlər Nazirliyi (ETSN) Milli Geoloji Kəşfiyyat Xidməti geoloji planlama ekspedisiyasının dəstə rəisi Rafiq Həsənov deyib.

Onun sözlərinə görə, Günəşli yaylası deyilən ərazində dik yamacın qurtaracağında 30-40 metr məsafədə tektonik qırılma xətti keçir: “Həmin xətlə dik yamac arasında yaşayış evləri var. Texnogen mənşəli amillərin təsirindən çökmə prosesi baş verib və torpaq qatlarında müxtəlif ölçülü iri çatlar əmələ gəlib. Ərazidə bəzi tikililərdə müxtəlif dərəcəli ziyan dəyib. Bəzi sakinlərə evdən çıxmaq təklif olunub”.

Rafiq Həsənov qeyd edib ki, atmosfer yağıntıların təsirindən ərazidə prosesin aktivləşməsi proqnozlaşdırılır.