"Ayna Sultanova" yaxınlığında yanğın söndürüldü - Video/Yeni

Bu saatlarda paytaxtın Ziya Bünyadov prospektində yanğın başlayıb.

Teleqraf.com-un hadisə yerində olan müxbiri xəbər verir ki, yanğın Nərimanov rayonu, Ayna Sultanova heykəlinə yaxın ərazidədir.

Məlumata görə, Atçılıq Mərkəzinin zibilliyi yandırılıb. Bu zaman alov yaxınlıqdakı taxta-parket mağazasına keçib.

Hadisə yerinə FHN-nin yanğınsöndürmə xidmətinin briqadası cəlb olunub.

Yanğının söndürülməsi üçün tədbirlər görülür.

***

Fövqəladə Hallar Nazirliyi Nərimanov rayonunda baş vermiş yanğınla bağlı açıqlama yayıb.

Nazirlikdən Teleqraf.com-a verilən məlumata görə, Böhran Vəziyyətlərində İdarəetmə Mərkəzinə Bakı şəhəri, Nərimanov rayonu ərazisində yanğın baş verməsi barədə məlumat daxil olub. Dərhal Fövqəladə Hallar Nazirliyinin Dövlət Yanğından Mühafizə Xidmətinin canlı qüvvə və texnikası hadisə yerinə cəlb olunub.

Yanğın saat 16:04-də yanğınsöndürənlər tərəfindən söndürülüb.​