İtkin düşən şagirdlər tapıldı: Artıq evdədirlər - Bakıda

Cəlilabad rayonunda itkin düşən 7-ci sinif şagirdləri 14 yaşlı İsmayıl Mətləb oğlu Əmənov, onun həmyaşıdı və qonşusu Xalid Altay oğlu Əliyev tapılıb.

Cəlilabad rayon 7 saylı tam məktəbindən Teleqraf.com-a verilən məlumata görə, uşaqlar Bakı şəhərində metronun "Nizami" stansiyasının yaxınlığından tapılıb:

“Sakinlərdən kimsə görüb, valideyinlərinə zəng edib məlumat veriblər. Valideyinləri də getmişdi gətirməyə. Artıq gəliblər evdədirlər. Vəziyyətləri də deyilənə görə, normaldı. Hansı məqsədlə getdiklərini hələ bilmirik”.

Qeyd edək ki, dünən Cəlilabad şəhər sakinləri, 14 yaşlı İsmayıl Mətləb oğlu Əmənov, onun həmyaşıdı və qonşusu Xalid Altay oğlu Əliyev dekabrın 21-i səhər saatlarında dərsə getmək adıyla evdən çıxıb və geri qayıtmayıblar.