Sabunçuda kafenin qarşısında qanlı dava: 2 yaralı

Bakının Sabunçu rayonunda bıçaqlanma hadisəsi baş verib.

Teleqraf.com xəbər verir ki, hadisə iyunun 3-də, gecə saat 1 radələrində Sabunçu qəsəbəsində qeydə alınıb.

Qəsəbədəki kafelərdən birinin qarşısından qəsəbə sakinləri A.Göyüşov və M.Allahverdiyev naməlum şəraitdə bıçaqlanıb.

Hər iki şəxs kəsilmiş-deşilmiş xəsarətlərlə xəstəxanaya gətirilib. Onlara tibbi yardım göstərilib.

A.Göyüşovun vəziyyəti orta-ağırdır. O, xəstəxanada hazırda həkim nəzarəti altında saxlanılır. M.Allahverdiyevə ilkin tibbi yardım göstərildikdən sonra evə buraxılıb

Hadisə ilə bağlı Sabunçu rayon Polis İdarəsinin 13-cü polis bölməsinə məlumat verilib.

13-cü polis bölməsi əməkdaşlarının keçirdikləri əməliyyat-axtarış tədbirləri nəticəsində hadisəni münaqişə zəminində törətməkdə şübhəli bilinən qəsəbə sakini, əvvəllər məhkum olunmuş Ə.Əzizov saxlanılıb.

Faktla cinayət işi başlanıb.