Sumqayıt-Bakı yolunda baş verən qəzanın - Təfərrüatı/Yeni

Bakı Nəqliyyat Agentliyi bu gün səhər saat 06:30 radələrində Xırdalan dairəsində zəncirvari yol nəqliyyat hadisəsinin baş verməsi barədə məlumat yayıb.

Agentlekdən Teleqraf.com-a verilən məlumatına görə, Bakı Nəqliyyat Agentliyində hadisə ilə bağlı müvafiq araşdırma aparılıb.

Zəncirvari qəzada zərər görən 199 nömrəli müntəzəm marşrut xətti üzrə daşıyıcı şirkət "Xaliq Faiqoğlu" MMC-dən verilən məlumata görə qəza 525 nömrəli müntəzəm marşrut xətti ilə hərəkət edən sərnişin avtobusunun işçiləri daşıyan servis avtobusuna dəyməsi nəticəsində baş verib.

Həmin vaxt ərazidən keçən 199 nömrəli müntəzəm marşrut xətt üzrə avtobusun sürücüsü qəzadan yayınmaq üçün manevr etsə də nəqliyyat vasitəsi sürüşərək Niva markalı avtomobilə dəyib. Niva isə digər minik avtomobilinə dəyib.

Qəza nəticəsində servis avtobusundakı sərnişinlərdən bir neçəsi xəsarət aldığı bildirilir.

***

10:36

Bu gün Bakı-Sumqayıt yolunda turizm şirkətlərindən birinə məxsus avtobusla 525 sayı sərnişin avtobusu toqquşub.

Teleqraf.com xəbər verir ki, bu barədə Nəqliyyat, Rabitə və Yüksək Texnologiyalar Nazirliyinə məxsus Dövlət Avtomobil Nəqliyyatı Xidmətinin (DANX) açıqlamasında bildirilir.

Məlumatda deyilir ki, bu səbəbdən yolda sıxlıq müşahidə edilib.

"Hazırda DANX-ın və Dövlət Yol Polisinin əməkdaşları hadisə yerindədirlər. İlkin məlumata görə, turizm şirkətinə məxsus avtobusun sürücüsü yağışlı havada sıxlıqdan çıxmağa cəhd edərək idarəetməni itirib və sərnişin avtobusunun sürücüsünü çaşdırıb.

Nəticədə 525 saylı avtobus turizm şirkətinə məxsus avtobusa çırpılıb. Hadisə nəticəsində ölən olmayıb. Avtobuslar yoldan çıxarılan kimi nəqliyyatın hərəkəti bərpa olunacaq", - deyə o, qeyd edib.

***

10:34

Bakı-Sumqayıt magistralında turizm şirkətinə məxsus avtobusla sərnişin daşıyan 525 saylı avtobus toqquşub.

Qəza nəticəsində Respublika Klinik Xəstəxanasına 50, 58, 41 yaşlı qadınlar və 59, 23 yaşlı kişilər olmaqla ümumilikdə 5 nəfər müxtəlif dərəcəli bədən xəsarətləri ilə müraciət edib.

Səhiyyə Nazirliyindənverilən məlumata görə, yaralılara lazımi tibbi yardımlar göstərilib və ambulator müalicəyə buraxılıblar.

***

09:26

Bakı-Sumqayıt yolunda avtomobil qəzası baş verib.

Teleqraf.com xəbər verir ki, qəzada 199 nömrəli marşrut avtobusu digər sərnişin avtobusu ilə toqquşub, xəsarət alanlar var.

Yol-nəqliyyat hadisəsi nəticəsində yolda tıxac yaranıb.