Kanadada Xocalıya həsr edilmiş abidə açılıb

Kanadanın Kalqari şəhərindəki “Confederation” Parkında Xocalı soyqırımı qurbanlarının xatirəsinə əkilmiş ağacın açılışı keçirilib. Azərbaycanın Kanadadakı səfirliyindən Teleqraf.com-a verilən məlumata görə, sözügedən ağacın qarşısında bərkidilmiş memorial lövhədə “Xocalı faciəsinin xatirəsinə” sözləri həkk edilib.

Tədbir səfirliyin dəstəyi ilə Kalqari şəhərində yaşayan həmyerlilərimizin qurduğu “Alberta Azərbaycan Mədəniyyəti Cəmiyyəti” tərəfindən təşkil edilib.

Mərasimdə çıxış edən Azərbaycanın Kanadadakı müvəqqəti işlər vəkili Ramil Hüseynli Xocalı soyqırımı haqqında danışıb, bu ağacın Kanadada Xocalı qurbanlarının xatirəsini yad edən ikinci belə abidə (ilk abidə Toronto şəhərindədir) olduğunu deyərək, bunu Xocalı həqiqətlərinin Kanadada yayılması baxımından mühüm hadisə kimi xarakterizə edib.

Daha sonra Kalqari şəhərinin digər bir parkı “Edworthy”də Xocalı faciəsinin qurbanlarının xatirəsinə həsr olunmuş oturacağın açılışı keçirilib. Oturacağın üzərindəki memorial lövhədə “Xocalı faciəsi qurbanlarının xatirəsinə” sözləri həkk edilib.

Səxavət