Bakıda oğurluq edən şəxslər həbs edildi

Bakının Nizami rayonunda oğurluq hadisəsi baş verib.

Teleqraf.com xəbər verir ki, rayonun M.Səfərli küçəsində yaşayan R.Yusufov polisə müraciət edərək ona məxsus dəyəri 1 150 manat olan iki velosiped naməlum şəxs tərəfindən oğurlandığını bildirib.

Nizami rayon Polis İdarəsinin 25-ci polis bölməsinin əməkdaşlarının keçirdiyi əməliyyat-axtarış tədbirləri nəticəsində hadisəni törətməkdə şübhəli bilinən, əvvəllər məhkum olunmuş, 1980-ci il təvəllüdlü Orxan Məmmədov saxlanılıb.

Bundan başqa, oğurluq etdiyinə görə tutulmuş R.Abdullayevin ətrafında Binəqədi rayon Polis İdarəsinin 43-cü polis bölməsində araşdırma aparılıb.

Onun rayon ərazisindəki 1 qarajdan 3000 manat dəyərində dəmir boru, 100 metr elektrik naqili, inşaat materialları və 1 evdən 500 manat dəyərində kombi oğurlaması müəyyən edilib.