Polis üç rayonda əməliyyat keçirdi – Həbs olunanlar var

Zərdab rayonunda narkotiklərlə bağlı əməliyyat keçirilib.

Teleqrafşcom xəbər verir ki, Zərdab rayon polis şöbəsi əməkdaşlarının keçirdikləri “Xaşxaş-2021” şərti adlı kompleks əməliyyat-axtarış və profilaktik tədbirlər nəticəsində Alcanlı kəndi ərazisində yabanı halda bitmiş, çəkisi 1,4 tondan artıq olan 1275 ədəd çətənə kolu aşkar edilərək məhv edilib.

Bundan başqa, Abşeron rayon Polis İdarəsi əməkdaşlarının keçirdikləri “Xaşxaş-2021” şərti adlı kompleks əməliyyat-axtarış və profilaktik tədbirlər nəticəsində Hökməli qəsəbə sakini, əvvəllər məhkum olunmuş N.Balabəyova məxsus həyətyanı sahədən kultivasiya yolu ilə yetişdirilmiş 16 ədəd çətənə kolu və marixuana aşkar edilib.

Oxşar əməliyyat Lənkəranda da keçirilib.

Lənkəran şəhər-rayon polis şöbəsi əməkdaşlarının daxil olmuş məlumat əsasında keçirdikləri əməliyyat tədbiri nəticəsində saxlanılan Səpnəkaran kənd sakini, əvvəllər məhkum olunmuş Ə.Fətullayevdən heroin aşkar edilib.

Davam etdirilən tədbirlərlə onun yaşadığı evin həyətinə baxış zamanı oradan kultivasiya yolu ilə yetişdirilmiş 4 ədəd çətənə kolu da götürülüb.

Ətrafında aparılan tədbirlərlə onun bir yarımtikili evdən paltaryuyan, otbiçən, su mühərriki, məişət əşyaları, 150 metr naqil, digər evdən isə 3800 manat dəyərində qızıl-zinət əşyaları oğurlaması da müəyyən edilib.