Bərdədə silahlı insident törədən şəxs saxlanıldı

Bərdə rayonunda silahlı insident olub.

Teleqraf.com xəbər verir ki, noyabrın 1-də saat 20 radələrində Mirzalıbəyli kəndi ərazisində kənd sakini Ə.Nəsirov Tərtər rayon sakini Ə.Bağırovla sonuncunun idarə etdiyi “VAZ-21102” markalı avtomobildə mübahisə edib.

Mübahisə zamanı Bağırov Nəsirovun qoluna bıçaqla xəsarət yetirib. Nəsirov avtomobildən düşərək qaçıb.

Daha sonra Bağırov avtomobilin yük yerində olan avtomat silahı götürüb və Nəsirovun həyətinə gəlib.

Orada atəş açıb və sonra gedib.

Baş verən hadisə barədə Bərdə rayon polis şöbəsinə məlumat daxil olub.

Polis əməkdaşları tərəfindən müvafiq tədbirlər həyata keçirilib.

Əməliyyat-axtarış tədbirləri nəticəsində Ə.Bağırov saxlanılıb.

Ondan “AK” markalı avtomat silahı, 1 ədəd patron darağı və 1 ədəd patron götürülüb.

Tibbi müayinədən keçirilərkən onun orta dərəcəli sərxoş olması müəyyən edilib.

Faktla əlaqədar Cinayət Məcəlləsinin 228.1-ci maddəsi ilə (qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə) cinayət işi başlanıb.