Bakıda qəzaya düşən maşından 40 min dollar oğurlandı – Təfərrüat

Bakının Sabunçu rayonunda avtomobildən pul oğurlanıb.

Teleqraf.com xəbər verir ki, Sabunçu rayon Polis İdarəsinin 15-ci polis bölməsinə Kürdəxanı qəsəbəsi ərazisində “KİA” markalı avtomobildən 40.000 ABŞ dollarının oğurlanması barədə müraciət daxil olub.

Polis əməkdaşlarının keçirdikləri əməliyyat tədbiri nəticəsində oğurluğu törətməkdə şübhəli bilinən Nardaran qəsəbə sakinləri Mirzəhəsən Kazımov və Vüqar Əsgərov müəyyən olunaraq saxlanılıblar.

Qeyd edək ki, oğurluq hadisəsindən əvvəl “KİA” markalı avtomobillə “Range Rover”markalı avtomobil toqquşub.

Bu zaman saxlanılan şəxslər avtomobilə yaxınlaşıblar və orada avtomobildə pul görüblər. Hər kəsin başının qarşıq olmasından istifadə edən şəxslər avtomobildə olan pulu oğurlayıblar.

Qeyd edək ki, hadisə nəticəsində "Kia"da olan iki nəfər ölüb, bir nəfər isə yaralı vəziyyətdə xəstəxanaya yerləşdirilib.

Faktla bağlı araşdırma aparılır.