Kəlbəcərdə hərbçilərimiz minaya düşdü, biri şəhid oldu - Yenilənib

Bu gün Kəlbəcər rayonunda 4-ü hərbçi olmaqla 8 nəfər minaya düşüb, onlardan biri şəhid olub.

Teleqraf.com xəbər verir ki, bu barədə Baş Prokurorluq və Müdafiə Nazirliyi birgə məlumat yayıb.

Belə ki, dekabrın 14-də, saat 18 radələrində Kəlbəcər rayonunun Çıraq kəndi ərazisində 8 nəfər şəxsin minaya düşməsi barədə Kəlbəcər hərbi prokurorluğuna məlumat daxil olub.

Aparılmış ilkin araşdırmalarla müəyyən olunub ki, təmir-tikinti işləri ilə məşğul olan şirkətin 4 nəfər əməkdaşı Kəlbəcər rayonunun Çıraq kəndi ərazisində piyada əleyhinə minaya düşüb.

Həmçinin, müəyyən olunub ki, təxliyə ilə bağlı hadisə yerinə yollanan 4 nəfər hərbçi də minaya düşüb, onlardan 3-ü müxtəlif dərəcəli bədən xəsarətləri alıb, 1-i isə ölüb.

Hazırda faktla bağlı Kəlbəcər Hərbi Prokurorluğunda araşdırma aparılır.

***

20:00

Bu gün Kəlbəcərdə baş verən mina partlayışında daha iki nəfərin xəsarət alması müəyyən edilib.

Beləliklə, Çıraq kəndi ərazisində mina partlayışı zamanı xəsarət alanların sayı 6-ya çatıb.

Teleqraf.com-un əldə etdiyi məlumata görə, onlardan biri dünyasını dəyişib.

***

19:00

Kəlbəcərdə 4 nəfər minaya düşüb.

Bu barədə Teleqraf.com-a Daxili İşlər Nazirliyinin (DİN) mətbuat xidmətindən məlumat verilib.

Bildirilir ki, bu gün axşam saatlarında Kəlbəcər rayonunun Çıraqlı kəndi ərazisində infrastruktur layihələrində çalışan 4 nəfərin minaya düşərək xəsarət alması ilə bağlı rayon polis şöbəsinə məlumat daxil olub.

Hazırda polis əməkdaşları aidiyyəti dövlət qurumlarının nümayəndələri ilə birlikdə hadisə yerinə cəlb ediliblər.