Azərbaycanda dəhşətli qəza: 6 nəfər öldü - Yeniləndi

Fövqəladə Hallar Nazirliyi Bakı-Quba yolunda 6 nəfərin ölümü ilə nəticələnən yol qəzası barədə məlumat yayıb.

Teleqraf.com xəbər verir ki, nazirliyin "112" qaynar telefon xəttinə Siyəzən rayonu ərazisində (Bakı-Quba avtomobil yolunun 85-ci kilometrliyi) yol-nəqliyyat hadisəsinin baş verməsi ilə əlaqədar xilasedici köməyinə ehtiyac yaranması barədə məlumat daxil olub.

Məlumatla əlaqədar FHN-nin Dövlət Yanğından Mühafizə Xidmətinin müvafiq xilasetmə qüvvələri çağırış üzrə cəlb olunub.

Əməliyyat şəraiti qiymətləndirilərkən müəyyən olunub ki, "Mercedes" markalı mikroavtobus və “DAF” markalı yük avtomobili toqquşub, 6 nəfər nəqliyyat vasitəsində sıxılmış vəziyyətdə qalıb.

Həyata keçirilən tədbirlər nəticəsində 6 nəfərin meyiti zədələnmiş mikroavtobusdan çıxarılaraq aidiyyəti üzrə təhvil verilib.

***

10.47

Bakı-Quba yolunun 98-ci kilometrliyinin Siyəzən rayonu ərazisindən keçən hissəsində baş verən qəzada 6 nəfər ölüb.

Daxili İşlər Nazirliyinin mətbuat xidmətindən Teleqraf.com-a verilən məlumata görə, Mersedes-Vitada olan sürücü daxil olmaqla 6 nəfər həlak olub, “Tır” sürücüsü xəsarət alıb.

***

10.37

Bakı-Quba yolunun 98-ci kilometrliyində (Siyəzən rayonu ərazisindən keçən hissəsində) ağır yol-nəqliyyat hadisəsi baş verib.

Teleqraf.com xəbər verir ki, Mersedes Vita markalı avtomobillə “Tır” ilə toqquşub.

İkin məlumata görə ölənlər və yaralılar var.

Yol-nəqliyyat hadisəsində ilkin məlumata görə, 6 nəfərin öldüyü bildirilir.

Hadisə yerinə polis əməkdaşları cəlb edilib, xilasetmə tədbirləri görülür.