Bakıda partlayış: Ölən var - Yeniləndi

Fövqəladə Hallar Nazirliyi təkərdoldurma məntəqəsində baş verən partlayışla bağlı məlumat yayıb.

FHN-dən Teleqraf.com-a verilən məlumata görə, nazirliyin “112” qaynar telefon xəttinə Bakı şəhəri, Binəqədi rayonu, Binəqədi qəsəbəsində yerləşən təkər təmiri sexində partlayış baş verməsi barədə məlumat daxil olub.

Dərhal əraziyə FHN-in Dövlət Yanğından Mühafizə xə Xüsusi Riskli Xilasetmə xidmətlərinin qüvvələri cəlb olunub.

Hadisə yerində əməliyyat şəraiti qiymətləndirilərkən vətəndaşa məxsus ümumi sahəsi 32 m² olan təkər təmiri sexində kustar üsulla hazırlanmış hava kompressorunda yanğınla müşayiət olunmayan partlayışın baş verdiyi müəyyən olunub. Partlayış dalğasının təsirindən sexin dam örtüyü dağılıb. Sexdə işləyən 1 nəfər aldığı müxtəlif bədən xəsarətlərindən hadisə yerində həlak olub.

Fövqəladə Hallar Nazirliyinin qüvvələri tərəfindən hadisə yerində müvafiq təhlükəsizlik tədbirləri görülüb.

Hadisə ilə əlaqədar aidiyyəti qurumlar tərəfindən təhqiqat aparılır.

***

TƏBİB təkərdoldurma məntəqəsində baş verən partlayışla bağlı məlumat yayıb.

Qurumdan bildirilib ki, baş verən hadisə ilə bağlı saat 10:12 radələrində TƏBİB-in tabeliyindəki Bakı Şəhəri Təcili və Təxirəsalınmaz Tibbi Yardım Stansiyasına çağırış daxil olub. Xəsarət alan bir nəfər TƏBİB-in tabeliyindəki Respublika Klinik Xəstəxanasına təxliyə edilib.

Ona ilkin tibbi yardım göstərilib. Daha sonra müayinələrdən imtina etdiyi üçün ambulator müalicə üçün evə buraxılıb.

***

Binəqədi Rayon Prokurorluğu təkərdoldurma məntəqəsində baş verən partlayışla bağlı məlumat yayıb.

Prokurorluqdan bildirilib ki, baş vermiş partlayışla əlaqədar prokurorluqda arşdırma aparılır.

Martın 4-ü saat 10 radələrində Binəqədi rayonu ərazisində yerləşən təkər təmiri sexində 1982-ci il təvəllüdlü Pərviz Dadaşovun ölməsi barədə rayon prokurorluğuna məlumat daxil olub.

Hadisənin hava təzyiqi işləyən cihazın partlaması nəticəsində baş verməsinə əsaslı şübhələr müəyyən edilib.

Faktla bağlı rayon prokurorluğunda araşdırma aparılır.

***

Bakıda ölümlə nəticələnən partlayış hadisəsi baş verib.

Hadisə Binəqədi şosesində yerləşən təkərdoldurma məntəqəsində qeydə alınıb.

Belə ki, partlayış nəticəsində bir nəfər ölüb.