Masallıda qasırğa və leysan çox sayda evə ziyan vurdu - Foto

Masallıda ötən gün baş verən qasırğa və yağan leysan yağışın vurduğu ziyan dəqiqləşdirilir.

Teleqraf.com Report-a istinadən xəbər verir ki, dövlət qurumlarının nümayəndələri əraziyə baxış keçiriblər.

İlkin məlumatlara görə, rayonun Təzə Alvadı kəndində 30-a yaxın evin dam örtüyünə ziyan dəydiyi, 5 evin isə yaşayış üçün qəzalı olduğu müəyyən edilib.

Bundan başqa güclü qasırğa və leysan yaşışla müşaiyət olunan qeyri-sabit hava şəraiti nəticəsində elektrik təsərrüfatına da ciddi ziyan dəyib. Əkin sahələri subasmaya məruz qalıb.

Təmir briqadaları elektrik enerjisinin verilişində yaranan problemlərin aradan qaldırılması istiqamətində çalışır.

Masallı rayon Fövqəladə Hallar Komissiyası tərəfindən əhaliyə dəymiş ziyan hesablanır.