Polis əməliyyat keçirdi – Həbs olunanlar var

Bakıda polis oğurluq edən şəxslərin tutulması üçün əməliyyatlar keçirib.

Teleqraf.com xəbər verir ki, Bakı şəhər Baş Polis İdarəsi və Nərimanov rayon Polis İdarəsinin 16-cı polis şöbəsi əməkdaşlarının birgə keçirdikləri əməliyyat tədbiri nəticəsində iyulun 30-da rayon ərazisindəki piyada keçidlərinin birində quraşdırılan ödəmə terminalından oğurluğa cəhd göstərən Bakı şəhər sakinləri 36 yaşlı Ramal Məmmədli və 31 yaşlı Tural Əhmədov saxlanılıblar.

Bundan başqa, Nərimanov rayon Polis İdarəsinin 17-ci polis şöbəsi əməkdaşlarının keçirdikləri əməliyyat tədbiri nəticəsində avqustun 2-də rayon ərazisindəki evlərin birindən mobil telefon oğurlamaqda şübhəli bilinən Ucar rayon sakinləri, əvvəllər məhkum olunmuşlar – Vüqar İslamov və Qulu Lətifov tutulublar.

Araşdırmalarla onların müxtəlif vaxtlarda rayon ərazisindəki daha 8 evdən pul, bank kartı və 9 ədəd mobil telefon oğurlamaları da müəyyən olunub.

Nizami rayon Polis İdarəsi əməkdaşlarının keçirdikləri əməliyyat tədbiri nəticəsində Bakı şəhər sakinləri 35 yaşlı Fizuli Qafarov və 34 yaşlı Rəşad Ağamalıyev saxlanılıblar.

Şəxsi axtarış zamanı onlardan metamfetamin aşkar olunaraq götürülüb.

Davam etdirilən tədbirlərlə R.Ağamalıyevin idarə etdiyi “Opel” markalı avtomobilə baxış zamanı oradan əlavə olaraq 2 kiloqramdan artıq heroin götürülüb.