İtaliya-Azərbaycan Cəmiyyətinin sədri Dino Zoffla görüşüb

İtaliya-Azərbaycan Əməkdaşlıq və Dostluq Cəmiyyətinin həmsədri Dündar Keşaplı Romada bu ölkənin futbol üzrə dünyaca məşhur, əfsanəvi qapıcısı Dino Zoff ilə görüşüb.

Söhbət zamanı bu yaxınlarda cəmiyyətin təsis edilməsi münasibətilə D.Keşaplını təbrik edən D.Zoff, qurumun Azərbaycan ilə İtaliya arasında əsasən mədəniyyət, moda, film, idman sahələrində əlaqələrin genişləndirilməsinə töhfə verəcəyinə əminliyini bildirib.

İdman sahəsində həyata keçiriləcək birgə layihələr və cəmiyyətin fəaliyyətinə D.Zoffun dəstəyi ilə bağlı fikir mübadiləsi aparılan görüşdə, Azərbaycanın müvafiq sektorda əldə etdiyi uğurlar, “Bakı-2015” İlk Avropa Oyunları barədə müzakirələr aparılıb.

Görüşün sonunda İtaliya-Azərbaycan Əməkdaşlıq və Dostluq Cəmiyyəti adından D.Zoffa plaket hədiyyə verilib.

Qeyd edək ki, İtaliya 1968-ci ildə Avropa çempionu, 1982-ci ildə isə İspaniyada keçirilmiş dünya çempionatının qızıl medallarına layiq görülərkən D.Zoff, bu ölkənin millisinin kapitanı olub.

Bəxtiyar