Aydın Abbasov: “Çin dilini öyrənəcəm”

Noyabrın 1-i Azərbaycanda növbəti parlament seçkiləri keçiriləcək. Artıq deputatlığa namizədliyin irəli sürülməsi üçün qanunvericilikdə nəzərdə tutulan müddət ötən gün başa çatıb.

Həmçinin, Milli Məclisin növbəti 5 illiyində bu ali qanunverici orqanda təmsil olunmayacaq deputatların siyahısı da məlumdur.

Modern.az saytı deputatlığa namizəd olmaqdan imtina edən və ya edilənlərin bundan sonra nə işlə məşğul olacaqlarını öyrənməyə çalışıb.

Hazırkı bitərəf deputat, baş nazirin keçmiş müavini Abbas Abbasovun oğlu Aydın Abbasov Modern.az-a açıqlamasında gələcək planlarından belə söz açıb.

“Çin dilini və Çinin yeni iqtisadi modelini öyrənmək lap çoxdankı arzum olub. Eyni zamanda, alman dilini də öyrənməyə böyük həvəsim olub. Sadəcə, işlərim çox olduğundan arzularımı gerçəkləşdirə bilməmişəm. Bundan sonrakı iş mexanizmimdə deputat kimi fəaliyyət göstərmək olmayacaq. Qismət olsa bu arzularımı həyata keçirməyə çalışacam”.

“Azərbaycanı tərk edib hansısa xarici ölkəyə üz tutmaq fikriniz ola bilərmi? sualına Aydın Abbasov belə cavab verib.

“Xarici şirkətlər arzulayırlar ki, Azərbaycanda işləsinlər... Düşünürəm ki, sualınıza cavab verə bildim”

Yeni Azərbaycan Partiyasından(YAP) olan hazırkı deputat Ərəstun Cavadov da bundan sonra hansı işlə məşğul olacağından danışıb.

“Hal-hazırda təqaüddəyəm. Bundan sonra istirahətlə məşğul olacam”.