Güclü təsir edən və zəhərli maddələrlə bağlı yeni qanun qəbul ediləcək

Hüquq siyasəti və dövlət quruculu komitəsi yeni layihəni müzakirə edib

“Güclü təsir edən maddələr və onların külli miqdarının, habelə, zəhərli maddələrin siyahılarının təsdiq edilməsi haqqında” ayrıca qanun olacaq.

Teleqraf.com xəbər verir ki, bununla bağlı qanun layihəsi parlamentin Hüquq siyasəti və dövlət quruculuğu komitəsinin bu gün 17-də keçirilən iclasında müzakirəyə çıxarılıb.

Komitə sədri Əli Hüseynli bu sənədin dövlət başçısının imzası ilə parlamentə daxil olduğunu bildirib. Qeyd edib ki, parlamentdə dəfələrlə narkotik vasitələr, psixotrop maddələr və onların prekursorlarının siyahısı təsdiqlənib, lakin bu məsələ indiyənəcən ayrıca qanunla tənzimlənməyib: “Odur ki, belə bir qanunun qəbul olunması zərurəti ilə bağlı müvafiq layihə hazırlanıb və parlamentə göndərilib”.

Nazirlər Kabinetinin nümayəndəsi Ceyhun Hüseynov qanun layihəsi barədə məlumat verərək bildirib ki, bu sənəd dövlət başçısının müvafiq sərəncamına əsasən Nazirlər Kabineti, həmçinin, Səhiyyə, Ədliyyə, Daxili İşlər nazirliklərinin, Azərbaycan Milli Elmlər Akademiyasının və Dövlət Gömrük Komitəsinin tövsiyələri əsasında hazırlanıb: “İndiyə qədər bu məsələ ölkəmiz üçün aktuallıq kəsb etmirdi. Ancaq indi belə bir aktuallıq meydana gəlib və bu baxımdan, müvafiq qanunun olması məqsədəuyğun sayılıb”.

Respublika Narkoloji Dispanserinin nümayəndəsi də qeyd edib ki, narkotik vasitələr və psixotrop maddələr güclü təsir edən maddələr siyahısına daxil deyil. Eyni zamanda, 52 adda zəhərli maddə mövcuddur.

Deputat Çingiz Qənizadə zəhərli maddələr siyahısında sirkə turşusunun göstərilməsinin əleyninə olduğunu bildirib: “Bu gün hər kəsin evində sirkə turşusu istifadə olunur. Onsuz da türmələrimiz insanlarla doludur, odur ki, yeni həbslərə də ehtiyac yoxdur. Yəni, sabah kiminsə evində sirkə turşusu var deyə onu həbs təhlükəsi gözləyə bilər. Ona görə də bu məsələyə məsuliyyətli yanaşma lazımdır”.

Nemət