Mourinyo: "Suares bu cəzaya layiq idi"

"Çelsi" klubunun baş məşqçisi Joze Mourinyo Uruqvay millisinin hücumçusu Luis Suaresin FİFA tərəfindən cəzalandırılmasına münasibət bildirib.

"Yahoo Sport"a danışan portuqaliyalı mütəxəssis Suaresin bu cəzaya layiq olduğunu deyib:

"Futbolda oyunçular və məşqçilər üçün müəyyən qaydalar var ki, ondan kənara çıxmaq olmaz. Mənim də zaman-zaman intizamsız hərəkətlərim olub, ancaq həddimi bilmişəm. Suares isə artıq üçüncü dəfə eyni hərəkəti etdi. Düşünürəm ki, o, bu cəzaya layiq idi".

Qeyd edək ki, Suares İtaliya ilə oyunda (1:0) rəqib müdafiəçi Corcio Kyellininin çiynini dişlədiyi üçün 4 aylıq futboldan kənarlaşdırılıb./qol.az/