Qadın güləşçimiz bürünc medal qazandı

Serbiyanın Novı Sad şəhərində güləş üzrə Avropa çempionatı davam edir.

Azərbaycan Güləş Federasiyasindan Teleqraf.com-a verilən məlumata görə, güləşçilərimiz ilk yarış günü 2 qızıl və 1 gümüş medalla başa vurub. Mariya Stadnik (48 kq) və Giorgi Edişeraşvili (57 kq) qızıl, Aleksandr Qostiyev (86 kq) isə gümüş medala sahib olub.

İkinci yarış günündə 65 və 97 kq sərbəst, 53 və 60 kq çəkidə isə qadın güləşçilər mübarizə aparıb. Güləşçilərimiz günü 1 bürünc medalla başa vurub.

60 kq çəkidə qadın güləşçilərin yarışında mübarizə aparan Tatyana Omelçenko Polşa və Belarusdan olan rəqiblərini tam üstünlüklə məğlub edib. Yarımfinalda Latviya idmançısına uduzan təmsilçimiz bürünc medal görüşünə haqq qazanıb. Həlledici görüşdə Ukrayna idmançısına qalib gələn Tatyana Omelçenko çempionatın bürünc medalını qazanıb.

65 kq çəkidə mübarizə aparan Gitinomaqomed Hacıyev ilk görüşdə Polşadan olan rəqibini üstələsə də növbəti görüşdə Rusiya idmançısına uduzub. Rəqibin finala yüksəlməsi ilə təsəlliverici görüşə qatılan təmsilçimiz Slovakiyadan olan rəqibinə qalib gəlib. Bürünc medal uğrunda görüşə haqq qazanan G.Hacıyevin rəqibi Gürcüstan idmançısı olub. Görüşü uduzan təmsilçimiz çempionatı 5-ci sırada tamamlayıb.